တၢ်နီၤဖး ၄
ပိာ်မုၣ်ဖိလၢအမၤသးခု အပါပၢ်ဒီးယဟိဝၤယွၤအသး
စီၤယံးဖသၤ တဲပာ်ဝဲယဟိဝၤယွၤ တၢ်မနုၤလဲၣ်
တညီလၢအဂီၢ် သနာ်က့ စီၤယံးဖသၤအဖိမုၣ် မၤဝဲဒ်အပါပၢ်တဲပာ်ဝဲအသိး
ပိာ်မုၣ်ဖိလၢတၢ်ဂီၤပူၤန့ၣ် မ့ၢ်နထံၣ်ဧါ.— အဝဲမ့ၢ်စီၤယံးဖသၤ အဖိမုၣ်လီၤ. လံာ်စီဆှံတတဲဖျါဝဲ အဝဲအမံၤဘၣ်. ဘၣ်ဆၣ်ဒီးပသ့ၣ်ညါလၢ အဝဲမၤသးခုအပါပၢ်ဒီး ယဟိဝၤယွၤအသးလီၤ. ပကမၤလိသကိးအဝဲဒီး အပါပၢ်စီၤယံးဖသၤအဂ့ၢ်မီၣ်.
စီၤယံးဖသၤမ့ၢ်ပှၤလၢအဂ့ၤတဂၤ ဒီးဟ့ၣ်တၢ်ဆၢကတီၢ်အါအါလၢ ကသိၣ်လိအဖိမုၣ်လၢ ယဟိဝၤအဂ့ၢ်အဂီၢ်န့ၣ်လီၤ. အဝဲမ့ၢ်စ့ၢ်ကီးပှၤလၢအဂံၢ်ဆူၣ်ဒီး ခိၣ်နၢ်လၢအဂ့ၤတဂၤလီၤ. လၢတၢ်န့ၣ်အဃိ ပှၤအံၣ်စရ့လးဖိတဖၣ် မၢအဝဲကဲခိၣ်ကဲနၢ် ဖဲအဝဲသ့ၣ်ဒုးတၢ်ဒီး အဒုၣ်အဒါအခါန့ၣ်လီၤ.
စီၤယံးဖသၤဒုးတၢ်ကနၢၤအဂီၢ် ဃ့ဝဲတၢ်မၤစၢၤလၢ ကစၢ်ယွၤအအိၣ်လီၤ. စီၤယံးဖသၤတဲပာ်ယဟိဝၤယွၤလၢ အဝဲမ့ၢ်မၤနၢၤတၢ်ဒုးဒီး ဖဲအဟဲက့ၤဆူအဟံၣ်အခါ ပှၤလၢအဟဲဆူအအိၣ် အဆိကတၢၢ်တဂၤန့ၣ် အဝဲကဟ့ၣ်ယဟိဝၤယွၤလီၤ. ပှၤတဂၤအံၤကဘၣ်မၤတၢ်ဒီး ကဘၣ်အိၣ်ဝဲလၢ ယွၤအဒဲစီဆှံတစိၤသးလီၤ. ဖဲန့ၣ်အဆၢကတီၢ်ဒဲစီဆှံန့ၣ် မ့ၢ်တၢ်လီၢ်လၢပှၤလဲၤ ဘူၣ်ထီၣ်ဘါထီၣ်ယွၤလီၤ. လၢခံန့ၣ်စီၤယံးဖသၤ မၤနၢၤတၢ်လီၤ. ဖဲအဝဲဟဲက့ၤဆူအဟံၣ်အခါ နဆိကမိၣ်လၢမတၤတဂၤ ဟဲဆူအအိၣ်အဆိကတၢၢ်လဲၣ်.—
မ့ၢ်, စီၤယံးဖသၤအဖိမုၣ်လီၤ. အဝဲမ့ၢ်အဖိထဲတဂၤဧိၤလီၤ. ခဲအံၤစီၤယံးဖသၤကဘၣ် ဆှၢအီၤဆူတၢ်လီၢ်အဂၤလီၤ. တၢ်အံၤမၤသးအုးအီၤဒိၣ်မးလီၤ. ဘၣ်ဆၣ်ဒီးသ့ၣ်နီၣ်ထီၣ်လၢ အဝဲတဲပာ်ယဟိဝၤယွၤဝံၤလံမီၣ်. ထဲန့ၣ်ဒီးအဖိမုၣ်တဲဆၢဝဲလၢ ‘ပါပၢ်ဧၢ နတဲပာ်ယဟိဝၤဝံၤလံအဃိ နကြၢးတီဒီးနတၢ်ကတိၤလီၤ.’
ကိးနံၣ်ဒဲး, စီၤယံးဖသၤ အဖိမုၣ်အတံၤသကိးတဖၣ် လဲၤဟးအိၣ်သကိးအီၤ
စီၤယံးဖသၤအဖိမုၣ်စ့ၢ်ကီး အသးအုးဝဲလီၤ. မ့ၢ်လၢဖဲဒဲစီဆှံန့ၣ်အဝဲဖျီအသး ဒီးဟံးန့ၢ်အဖိတသ့ဘၣ်အဃိလီၤ. ဘၣ်ဆၣ်အဝဲအသးအိၣ်ဒိၣ်မးလၢ ကမၤလၢပှဲၤအပါပၢ် အတၢ်ကတိၤဒီး ကမၤသးခုယဟိဝၤယွၤအသးလီၤ. တၢ်ဝဲအံၤန့ၣ်အရ့ဒိၣ်န့ၢ်ဒံး အဝဲကဖျီဘၣ်အသး ဒီးကဟံးန့ၢ်အဖိန့ၣ်လီၤ. လၢတၢ်န့ၣ်အဃိ အဝဲပာ်တ့ၢ်အဟံၣ်ဒီးလဲၤအိၣ်ဝဲလၢ ဒဲစီဆှံတစိၤသးလီၤ.
နဆိကမိၣ်လၢ အဝဲမၤတၢ်န့ၣ် ဒုးသးခုအပါပၢ်ဒီး ယဟိဝၤယွၤအသး ကစီဒီဧါ.— ဒုးသးခုဝဲလီၤ. နနၢ်မ့ၢ်လိၤဒီး နမ့ၢ်အဲၣ် ယဟိဝၤယွၤန့ၣ်, နကလီၤဂာ်ဒ်သိးဒီး စီၤယံးဖသၤ အဖိမုၣ်လီၤ. နၤစ့ၢ်ကီး နကမၤသးခု နမိမိၢ်ပါပၢ်ဒီး ယဟိဝၤယွၤအသးလီၤ.
