LONGI 4
Wayangidika Se Diandi yo Yave
Yefeta nkia nsilu kasia kwa Yave?
Diampasi diakala, kansi mwan’a Yefeta wavanga dina se diandi kasia nsilu
Nga omwene dumbelele kina mu fwaniswa?— E dumbelele kiaki mwan’a Yefeta. O Nkand’a Nzambi ke uyikanga nkumbu andi ko. Kansi, tuzeye wo vo wayangidika se diandi yo Yave. Yambula twalongoka mayingi mu kuma kiandi yo Yefeta wa se diandi.
Yefeta muntu ambote kakala. Waviokesanga ntangwa yayingi muna longa mwan’andi mambu ma Yave. Nkwa ngolo ye mfidi ambote mpe kakala. Muna kuma kiaki, Aneyisaele banlomba vo kavita o ntu muna vita benwana ye mbeni zau.
Yefeta walomba lusadisu kwa Nzambi mu sunda e vita. Yefeta wasia o nsilu vo avo osundidi e vita, ovana kwa Yave o muntu antete okwiza kunkika vava kevutuka kuna nzo. O muntu ndioyo ozingila kuna saba kia Nzambi yo sadila kuna e zingu kiandi kiawonso. E saba i fulu kina wantu bayenda sambidilanga Nzambi muna lumbu yayina. O Yefeta wasunda e vita. Nga ozeye kana nani i muntu antete wayiza kunkika vava kavutuka kuna nzo?—
Elo, mwan’a Yefeta. Mwana ndioyo kaka kakala yandi. Owau, Yefeta kafwete kunsindika. Ediadi diankendeleka kikilu. Kansi, sungamena vo nsilu kasia. Vana vau o mwan’andi wavova vo: ‘E tata nsilu wasia kwa Yave, muna kuma kiaki lungisa wo.’
Konso mvu, akundi a mwan’a Yefeta bayendanga kunkingula
Mwan’a Yefeta wakendalala mpe. Kuna saba, o mwana ndiona kadi sompa ko ngatu wuta wana. Kansi, wazola vo nsilu a s’andi walungana yo yangidika Yave. Ediadi i diasunda o mfunu kwa yandi ke mu kazala ko yovo wuta wana. Muna kuma kiaki, wasisa e nzo au yo kwenda zingila kuna saba e zingu kiandi kiawonso.
Nga obenze vo dina kavanga diayangidika se diandi yo Yave?— Elo, diabayangidika kikilu. Avo olemvokele Yave yo kunzola, olenda kala nze mwan’a Yefeta. Ongeye mpe oyangidika mase maku yo Yave.
