ICISAMBILILO 4
Alisangaleshe Bawishi na BaYehova
Findo Yefita alukulaya baYawe?
Imyaka yonse, ababyakwe ba mwana wakwe Yefita balukuya mu kumubonako pe sema
Kani wamubona moye mu cikope?— Mwana umwanakashi uwakwe Yefita. Baibolo tailabilapo ishina lyakwe, pano tuliishi ati alisangaleshe bawishi na baYehova. Nga tusambilile pali ye na pali ba Yefita, bawishi.
Yefita aali mwalalume umuweme kabili alukupyungishe’mpindi iikulu ukulukusambisha umwana wakwe pali baYehova. Aali mwalalume umukosele kabili intangishi iiweme. Popele abaIshilaeli balimwebele ati abatangilile mu kulwa ne bapate babo.
Yefita alitembeele kuli baLesa ati bamofweko ukucimfye’nkondo. Yefita alilaile ati kani acimfye, akupeela baYehova umuntu uwa kutanga ukumucinsha ukufuma mu ŋanda yakwe ili akubwela. Uyu umuntu akulukwikala ne kupyungila pe sema lya baLesa umweo wakwe onse. Isema lyali mupunda uku abantu balukuya akale mu kupempela baLesa. Yefita alicimfishe inkondo! Kani waishiba uwatangilepo ukufuma mu ŋanda ili abwelele?—
Inya, mwana wakwe umwanakashi! Yefita aali lukoso ne mwana umo, pano aali ne kumupeela kuli baYehova. Ici kacimubombomanika ukwakuti. Pano anuka ati ifi efi alaile. Penka’po, umwana kaalabila ati: ‘Tata, mwalilaile baYehova, na muli fyefyo citeni koti kulaya kwenu.’
Tacalipo icipubile, pano umwana wakwe Yefita alicitile ifi bawishi balaile
Umwana wakwe Yefita na ye alibombomene. Pe sema, taelelwepo ukuupwa neli ukuba ne bana. Pano alukufwaisha ukucita ifi bawishi balaile ne kusangalasha baYehova. Ukucite’fyo kwali kucindeme kuli ye ukucila pa kuupwa neli pa kuba ne bana. Penka alifuminepo pa ŋanda ne kuya mu kwikala pe sema umweo wakwe onse.
Kani ulukulanguluka ati ifi acitile fyalisangaleshe bawishi na baYehova?— Inya, fyalibasangaleshe! Kani ulukumfwila baYehova ne kubatemwa, ungaba koti mwana wakwe Yefita. Na webo ukasangalasha abafyashi bobe na baYehova.
