CIIYO 4
Wakalengesha Baishi Alimwi a Yehova Kusangalala
Ino ncishomesho nshi Jefuta ncaatoshomesha Yehova?
Tacalinga cuubu, sombi mwanaakwe Jefuta wakacita cakashomesha baishi
Sa wamubona mwanike uli papikica abaishi?— Ngumwaana mwanakashi wakwe Jefuta. Baibo taitwaambiliwo liina lyakwe, sombi tulicishi ayi wakasangalasha baishi alimwi a Yehova. Atwiiye pali nguwe alimwi abaishi ba Jefuta.
Jefuta wakalinga muntu mubotu alimwi wakatola ciindi cilaamfu kwiisha mwanaakwe pali Yehova. Wakalinga musankwa muyumu alimwi mutanjilishi mubotu. Aboobo bene Isilaeli bakamusenga ayi abatanjilile mukulwana nkondo abalwani babo.
Jefuta wakapaila kuli Lesa ayi amucafwe kukoma. Jefuta wakashomesha cakulumbila ku Mwaami Lesa ayi aakubolela alakupa Yehova muntu eshi akatangune kuswa muŋanda yakwe. Muntu uyu ulaakukala akusebensa paŋanda yakwe Lesa buumi bwakwe boonse. Ŋanda yakwe Lesa wakalinga ngu musena uko bantu nkobakalinga kulambilila. Jefuta wakakoma kunkondo! Sa ulimushi wakatanguna kuswa muŋanda yakwe ndyaakapiluka?—
Ee, ngumwanaakwe Jefuta mwanakashi! Wakalinga ngomwaana eenkabo ngwakalinga kucite, ano wakalinga kweelete kumutola ku ŋanda yakwe Lesa. Ici cakamupa buumba abuumbi. Ono ibaluka, Jefuta wakashomesha. Lyalo mwanaakwe wakamukumbula ayi: ‘Namwakashomesha Mwaami Lesa amucite kweelana ambomwakashomesha.’
Mwaka amwaka, babye mwanaakwe Jefuta bakalinga kuya mukumufwakashila
Mwanaakwe Jefuta alakwe wakoongumana. Paŋanda yakwe Lesa taakwe kweebwawo nabi kuba abana. Sombi wakalinga kusunishishi kucita sheesho baishi nshebakashomesha alimwi akusangalasha Yehova. Kucita ceeci kwakalinga kucindeme kuli nguwe kwiinda kweebwa akuba abana. Aboobo wakaswa kumishabo akuya mukukala kuŋanda yakwe Lesa buumi bwakwe boonse.
Sa utoyeeya ayi nshakacita shakasangalasha baishi a Yehova?— Ee, shakabasangalasha! Na unonyumfwila alimwi akusuna Yehova, awebo inga waba anga ngumwanaakwe Jefuta. Awebo inga wasangalasha bashali bako alimwi a Yehova.
