HENˇ YUˬ TUˬ 4
Yawˇ lehˬ Awˬ pa leh Yaˬhoˉvaˬ Ha lehˬ tuˬ Te Piˇ ve yoˬ
Yeˍhpaˍtaˆ Yaˬhoˉvaˬ htaꞈ aˬ htoꞈ ma ka tiꞈ te piˇ chehˇ ve le.
Maˇ sha. Yaꞈ hkʼaˇ Yeˍhpaˍtaˆ ve yaˇ miˇ awˬ pa ka tiꞈ awˬ hkʼaˇ suh gʼaꞈ te ve yoˬ
Awˬ han awˬ hkʼaw lo yaˇ miˇ ehˉ htaꞈ mawˬ˗aw laˇ.— Yawˇ awˬ pa lehˬ Yeˍhpaˍtaˆ meh ve yoˬ. Liꞈ hpu awˬ hkʼaw lo yawˇ ve awˬ meh maˇ cawˬ. Yaꞈ hkʼaˇ, yawˇ lehˬ awˬ pa leh Yaˬhoˉvaˬ ha lehˬ tuˬ te piˇ ve yoˬ tehꞈ ngaˬ hui shiˍ ve yoˬ. Yawˇ ve awˬ lawn htaꞈ kaꞈ, yawˇ ve awˬ pa Yeˍhpaˍtaˆ ve awˬ lawn htaꞈ kaꞈ, ngaˬ hui teˇ geh henˇ nyi la sheˍ.
Yeˍhpaˍtaˆ lehˬ daꞈ ve chaw teˇ gʼaˇ hpehꞈ leh yawˇ ve yaˇ miˇ htaꞈ Yaˬhoˉvaˬ ve awˬ lawn maˍ piˇ tuˬ awˬ yanˇ yehˇ maˇ ve yoˬ. Yawˇ haꞈ hanˉ jaˇ leh daꞈ ve sheh kʼai shehˍ hpaˇ kaꞈ teˇ gʼaˇ hpehꞈ ve yoˬ. Chi htaꞈ pa taw, Iˉsaˍreˍlaˆ chaw hui canˇ paˍ htaꞈ ca bawˆ daꞈ tuˬ yawˇ hui yawˇ htaꞈ sheh kʼai tcuh ve yoˬ.
Yeˍhpaˍtaˆ maꞈ bawˆ gʼaˇ tuˬ Gʼuiˬ sha geh bon lawˬ ve yoˬ. Yeˍhpaˍtaˆ ka tiꞈ te leh kʼoˆ ve, yawˇ maꞈ bawˆ gʼaˇ leh aˉ hkʼaw kʼawꞈ la htaˇ awˉ lawˉ ca haꞈ yuˬ la ve teˇ gʼaˇ Yaˬhoˉvaˬ htaꞈ chiˇ aꞈ laˇ tuˬ yoˬ. Kʼoˆ gaˇ ve lehˬ, chaw oˇ ve teˇ gʼaˇ Gʼuiˬ sha ve aˉ po kʼo bon yehˬ hkʼaw chehˇ leh teˇ co˗e kanˉ te ve yoˬ. Oˇ teˇ co˗e ve aˉ po kʼo bon yehˬ lehˬ Gʼuiˬ sha htaꞈ oˉ kʼoˍ pui kuiˬ hpehꞈ ve yoˬ. Yeˍhpaˍtaˆ maꞈ bawˆ gʼaˇ ve yoˬ. Nawˬ shiˍ˗aˬ laˇ, aˉ hkʼaw gaˬ la htaˇ, a shu teˇ gʼaˇ yawˇ htaꞈ awˉ lawˉ ca haꞈ yuˬ la ve le.—
Cawˇ ve yoˬ, Yeˍhpaˍtaˆ ve yaˇ miˇ hpehꞈ ve yoˬ. Yawˇ lehˬ yawˇ ve yaˇ tiˍ hpehꞈ ve yoˬ. Leh chi teˇ hkui Yeˍhpaˍtaˆ ve yaˇ miˇ aˉ hkʼaw gʼa tawˆ kʼai ve yoˬ. Chi htaꞈ pa taw Yeˍhpaˍtaˆ nyi ma luˬ jaˇ ve yoˬ. Yaꞈ hkʼaˇ, yawˇ ka tiꞈ te taˍ peuˬ tehꞈ taˇ leunˇ. Yawˇ yaˇ miˇ yawˇ htaꞈ laꞈ haˉ kʼoˆ piˇ ve, ‘nawˬ Yaˬhoˉvaˬ htaꞈ ka tiꞈ te taˍ peuˬ. Hkʼe te leh, ka tiꞈ hkʼaˇ suh gʼaꞈ te˗o.’
Teˇ hkʼawꞈ le le, Yeˍhpaˍtaˆ ve yaˇ miˇ geh awˬ chawˇ ca guiˇ la ve yoˬ
Yeˍhpaˍtaˆ ve yaˇ miˇ htawˇ nyi ma luˬ ve yoˬ. Aˉ po kʼo bon yehˬ lo awˬ hpawˇ maˇ gʼa heuˆ leh yaˇ maˇ cawˬ gʼa. Yaꞈ hkʼaˇ, yawˇ awˬ pa ka tiꞈ awˬ hkʼaˇ suh gʼaꞈ te gaˇ jaˇ leh Yaˬhoˉvaˬ htaꞈ ha lehˬ piˇ tcuh gaˇ ve yoˬ. Yawˇ awˬ pon lehˬ awˬ ceuˬ chi htaꞈ te tuˬ awˬ hpawˇ heuˆ leh yaˇ cawˬ tuˬ aꞈ kehˉ a yeˇ uiˍ jaˇ ve yoˬ. Chi htaꞈ pa taw, aˉ hkʼaw tawˆ kʼai leh yawˇ teˇ co˗e aˉ po kʼo bon yehˬ lo ca chehˇ kʼai ve yoˬ.
Nawˬ hkʼaˬ hkʼe dawˇ le, yawˇ te ve awˬ ceuˬ awˬ pa leh Yaˬhoˉvaˬ ha lehˬ ve laˇ.— Ha lehˬ ve yoˬ. Yeˍhpaˍtaˆ yaˇ miˇ hkʼa shuˍ Yaˬhoˉvaˬ hkawˇ htaꞈ na yuˬ leh yawˇ htaꞈ haꞈ ve kʼo, nawˬ pa nawˬ e leh Yaˬhoˉvaˬ ha lehˬ tuˬ yoˬ.
