CHILONGESA 4
Evwishile Kuwaha Ise naYehova
Yefweta ali nakushika Yehova vyuma muka?
Numba tuhu chapwile chachikalu, oloze mwana Yefweta ateselemo lushiko luze ise ashikile Yehova
Unamono ou kanyike wapwevo ali hamuvwimbimbi tahi?— Ikiye mwana Yefweta. Mbimbiliya kayatulweza lijina lyenyiko, oloze twejiva ngwetu evwishile kuwaha ise naYehova. Mana tushimutwile jino chihande chayou kanyike wapwevo naise Yefweta.
Yefweta apwile mutu wamuchima wamwaza, kaha anangwilenga mwanenyi kulinga vyuma asaka Yehova. Apwile samalikita, kaha nawa twamina wamwaza. Likumbi limwe vaIsalele vamulwezele avatwaminyine kuya nakulwa jita navaka-kole javo.
Oloze shimbu kanda vayenga, Yefweta alombele kuli Kalunga mangana avakafwe vajihe vaka-kole javo. Yefweta ashikile Yehova ngwenyi, nge mwamukafwa akajihe vaka-kole jenyi kujita, kaha mwakasuula kala mutu apwile kuzuvo yenyi uze mwakalivanga kwiza nakumusesa omu navakakinduluka kujita. Mutu kana mwakatwamanga hatavanaku nakuzachila Kalunga mukuyoya chenyi chosena. Tavanaku chapwile chihela chize vatu valikungulwililengaho nakulemesa Kalunga makumbi akunyima. Kufumaho, Yefweta ayile kujita. Kutokwa nawa, Kalunga amukafwile kunongesa vaka-kole javo vosena. Unatachikiza mutu watete uze alovokele muzuvo nakwiza nakumusesa tahi?—
Eyo, mwanenyi wapwevo! Ou ikiye kaha mwana apwile nenyi. Yefweta atelele kumusuula ayenga nakuzachila kutavanaku ngana muze ashikile Yehova. Echi chamwivwishile ushona chikuma. Oloze atelele kulinga muze ashikile Yehova. Kaha mwanenyi alwezele ise ngwenyi: ‘Tata, mwashikile lyehi Yehova, shikaho mwatela kutesamo vyuma mwamushikile.’
Mwaka himwaka masepa jamwana Yefweta vayilenga nakumumeneka
Ou kanyike wapwevo nayikiye evwile ushona hakushinganyeka kuseza ise Yefweta. Kuya nakuzachila hatavanaku chalumbunwine nge katelele kusomboka chipwe kusema vanako. Oloze ahonene mwakulingila mwomwo asakile kukavangiza mazu aise nakwivwisa Yehova kuwaha. Amwene ngwenyi kuzachila Yehova chapwile chachilemu chikuma kuhambakana kusomboka nakusema vana. Kaha afumine hembo lyavo nakuya nakutwama hatavanaku nakuzachila Yehova mukuyoya chenyi chosena.
Uno vyuma alingile vyasuulwishile ise nakwivwisa Yehova kuwaha tahi?— Mukiko vene, vevwile kuwaha. Nge nayove nawononokanga visemi jove nakuzanga Yehova ngana mwayou mwanaYefweta, kaha nawivwisa kuwaha visemi jove naYehova.
