XØRꞸ 4
Na xuntrʼi kʼꞹ o tsjapꞹ ro mⱥjⱥ o mꞹbʼꞹ e Jehová ñe o tata
¿Pje ma promesa go tsjapꞹ e Jefté e Jehová?
E Jefté o tsjapꞹ na promesa e Jehová, o xuntrʼi o tsjaa kʼo bi mama o tata zo me ma sʼɇzhikʼo
¿Gi pa̱rge kjo mi ngeje ne tsʼixutrʼi kʼꞹ kuatrʼꞹba kja ne dibujo?... Ne Biblia mama mi ngeje o tsʼixutrʼi e Jefté, pe dya mama pje mi chju̱u̱. Kʼo go tsjaa kʼe tsʼixutrʼi o tsjapꞹ ro mⱥjⱥ e Jehová ñe e Jefté. Mo ra xørꞹjiba ngekʼua ra pa̱ra̱ji pje go tsjaa e Jefté ñe pje go tsjaa o xuntrʼi.
E Jefté mi ngeje na bʼɇzo kʼꞹ me ma jonte. Pama pama mi jichi o tsʼixutrʼi, mi xipji ja ma kjaa e Jehová. E Jefté mi ngeje na bʼɇzo kʼꞹ me ma zɇzhi, mi pa̱ra̱ ja rgua ndo̱njo̱ chu̱ʼu̱. Ngekʼua kʼo israelita go ñɇmeji ro manda kja kʼo xundaro.
Na nu paa e Jefté go dyøtꞹ e Jehová, go xipji: “Ma ri pjøxkꞹjme ra to̱mpꞹjme chu̱ʼu̱ kʼo ntee kʼo me ꞹngꞹzgojme. Ma ra nzhogo kja in nzungo, nu ntee kʼꞹ otrʼꞹ ra mbedye ra dakʼꞹ ngekʼua ra mbɇpkʼige kja in nzunge”. Kʼe ntee pɇski ro ma mimi bʼɇxtrjo kja kʼe tabernáculo ngekʼua ro ma pɇpjinu ndexe yo paa asta kja ro ndu̱u̱. Kʼe tabernáculo mi ngeje na ngumꞹ ja mi matrʼꞹji e Jehová. ¿Go ndo̱njo̱ kʼe chu̱ʼu̱ e Jefté? Ja̱a̱, go ndo̱njo̱ kʼe chu̱ʼu̱. Ma go nzhogꞹ kja o ngumꞹ, ¿gi pa̱rge kjo nge kʼꞹ go mbedye go ma ndꞹnrꞹ?...
¡Mi ngeje o xuntrʼi! Ma go jñanrra e Jefté me go nzhumꞹ, mi pa̱ra̱ ke ngextrjo kʼe xuntrʼi kʼꞹ mi ñʼeje. Nudya pɇski ro tsjaa kʼo bi xipji e Jehová, o xuntrʼi ro ma pɇpji kja kʼe tabernáculo. ¿Pje go mama kʼe xuntrʼi? Angeze go xipji o tata: “Mi tatago pɇski ri tsjaa kʼo gui xipji e Jehová”.
Tsjɇma tsjɇma kʼo xuntrʼi kʼo mi joji o xuntrʼi e Jefté mi pa zenguaji
Kʼe xuntrʼi me go zichʼi kja o mꞹbʼꞹ ma go mba̱ra̱kʼo, nange mi pa̱ra̱ ke ma ro zidyiji kja kʼe tabernáculo ro zogꞹ o ngumꞹ, dya ro chjꞹntꞹ ñe dya ro ñʼeje tsʼitrʼi. Pe angeze mi nee ro mⱥpⱥ e Jehová, ngekʼua go tsjaa ja nzi ma nee o tata. Go ma pɇpji kja kʼe tabernáculo ndexe yo paa asta ma go ndu̱u̱.
¿Ja ba zoʼo e Jehová ñe e Jefté ma go jñandabi kʼo bo tsjaa kʼe xuntrʼi?... ¡Ja̱a̱, me ko mⱥjⱥbi! Nutsʼkʼe søø ri tsjage ja ba tsjaa o xuntrʼi e Jefté. Mꞹ ri dyⱥtⱥ in tata ñe ni nana ñe mꞹ ri tsjage ja ga nee e Jehová, angezeji me ra mⱥjⱥji.
