Laulau ai ina kekeni o itaiamu?​— Ia na Iefeta natuna kekenina. Baibel ese ladana na se gwauraia, to mai dibada ia na tamana bona Iehova e hamoaledia. Mani ia bona tamana Iafeta sivaraidia aita ita.

Iefeta na tau namona bona Iehova sivaraina na nega iboudiai natuna e hadibalaiava. Danu, ia na tau mai goadana bona hegunalai tauna namona. Una dainai, Israel taudia ese e noia tuari ai baine gunalaidia.

Iefeta ese Dirava e noia baine kwalimu totona. Ia na e gwauhamata bema baine kwalimu, iena ruma bainela neganai, baine raka lasi guna tauna na Iehova baine henia. Bona ia na ena mauri  dinadia iboudiai Dirava ena kalaga helaḡana ai baine ḡaukara. Kalaga helaḡana na taunimanima ese Dirava e tomadiho heniava gabuna. Bona momokani, Iefeta na e kwalimu! Oi mai dibamu ena ruma e lou lao neganai, daika e raka lasi guna?​—

Oibe, Iefeta natuna kekenina! Ia mo sibo-sibona e vara, to hari vada be siaiamu. Bona tamana na e lalohisihisi bada herea. To, ba helalotao, Iefeta na gwauhamata ta e karaia. Una dainai natuna ese e hamaoroa: ‘Tamagu e, bema Iehova o gwauhamata henia, emu hereva heḡereḡerena ba kara.’

Iefeta natuna danu e lalohisihisi. Badina kalaga helaḡana ai ia na basine headavamu bona natuna basine havaramu. To ena ura badana na tamana ena gwauhamata baine badinaia bona Iehova baine hamoalea. Ia enai Iehova ihamoalena ese headava bona natu havara e hereaia. Una dainai, ena ruma e rakatania bena ela kalaga helaḡana ai baine ḡaukara ena mauri dinadia iboudiai.

O laloamu ena kara ese tamana bona Iehova e hamoaledia?​— Oibe! Bema bo kamonaimu bona Iehova bo lalokau heniamu, oi na Iefeta natuna heḡereḡerena. Tamamu, sinamu bona Iehova bo hamoaledia dikadikamu.