¿Tijmati ajkia ni siuapil katli nesi ipan tlaixkopinkayotl?... Eliyaya Jefté isiuapil. Biblia amo kiijtoua kenijkatsa motokaxtik. Jehová uan Jefté tlauel yolpajkej ika tlen kichijki. Ipan ni tlapoualistli tikitasej tlake kipanok Jefté uan isiuapil.

Jefté eliyaya se kuali tlakatl uan nochipa kimachtiyaya isiuapil tlen Jehová kichijtoya. Nojkia kipiayaya chikaualistli uan eliyaya se kuali tlayakanketl. Yeka nopa israeleuanij kiiljuitoj ma kinyakana kema kinteuiskiaj ininkualankaitakauaj.

Jefté momaijtok uan kitlajtlanik Jehová ma kinpaleui. Kiiljuik tlaj kinpaleuiskia ma tlatlanikaj, kimakaskia katli achtoui yaskia kinamikiti kema asiskia ichaj. Katli Jefté kimakaskia Jehová, monekiyaya  itstoti ipan tabernáculo uan nochipa tlatekipanoskia nopaya. Nopa tabernáculo eliyaya se kali kampa kiueyichiuayayaj Jehová. ¿Timoiljuia tlatlanki Jefté kema tlateuito? ¡Kena! Uan kema asito ichaj, ¿tijmati ajkia kinamikito?...

Kinamikito iichpoka. Jefté kipiayaya san setsi iichpoka, yeka tlauel mokuesok pampa monekiyaya kititlanis ma itstoti ipan tabernáculo. Xikilnamiki, Jefté kiiljuijtoya Jehová kimakaskia katli achtoui yaskia kinamikiti. Yeka iichpoka kiiljuik: “Notata, moneki tijchiuas tlen tikiljuik Jehová”.

Jefté iichpoka nojkia tlauel mokuesok, pampa tlaj itstoskia ipan tabernáculo, amo monamiktiskia yon amo kinpiaskia ikoneuaj. Maske mokuesok, kichijki tlen itata kiijtojtoya. Ya kiitayaya tlauel ipati kichiuas tlen kipaktiyaya Jehová maske amo monamiktiskia uan amo kinpiaskia ikoneuaj. Yeka yajki ipan tabernáculo uan nopaya mokajki.

¿Timoiljuia yolpajkej Jehová uan Jefté ika tlen kichijki nopa ichpokatl?... Kena, ¡tlauel yolpajkej! Ta nojkia uelis tijchiuas kej Jefté iichpoka. Tlaj tlauel tikiknelis Jehová uan tijneltokas, ya uan motatauaj tlauel yolpakisej.