¿Tikita takotsin itech tlaixkopinal?... Ye iichpoch se tlakatl tlen omotokayotiaya Jefté. Itech Biblia amo tikajsij tlen itoka, maski ijkon, tikmatij okinekiaya kiyolpaktis itajtsin uan Jehová. Ma timomachtikan itech ye uan itech itajtsin.

Jefté okatka se tlakatl yolkuali uan itech miak kauitl okimachtiaya ikone itech Jehová. Noijki okatka se tlakatl chikauak uan se kuali tlayekanki. Ik non, israelitas okiluijkej ma kinyekana pampa moteuiskiaj iuan akinmej okinkokoliayaj.

Jefté omotlatlaujti itech toTajtsin Dios pampa ma kipaleui ma tlatlani. Jefté okijto tla tlatlaniskia, kimakaskia akin achto kinamikiti ijkuak ye ualmokuepaskia ikalijtik.  Uan Jefté otlatlanki. Itech nochi iyolilis nin tlaltikpaktlakatl chantiskia uan tekitiskia itech itabernáculo toTajtsin Dios. Tabernáculo okatka sekan kanin yiuejkika tlaltikpaktlakamej oyayaj pampa kiueyichiuaskej toTajtsin Dios. Ijkuak omokuepki ikalijtik, ¿tikmati akin achto okiski?...

Kema, iichpoch. Jefté okipiaya san se ikone, uan axkan ye kititlaniskia. Ye sapanoa omoyolkoko. Maski ijkon, xikilnamiki ye okijto kichiuas. San niman iichpoch okijto: ‘Notajtsin, te yotikilui Jehová, uan moneki tikchiuas’.

Iichpoch Jefté noijki omoyolkoko. Itech tabernáculo ye amo monamiktiskia nion kinpiaskia ikoneuan. Maski ijkon, ye okinekiaya kichiuas tlen okijto itajtsin uan kiyolpaktis Jehová. Ye okachi okipatioitak non uan amo monamiktis uan kinpias ikoneuan. Ye okika ikalijtik uan ochantito itech tabernáculo itech nochi iyolilis.

¿Timokuayejyekoa tlen okichi okiyolpakti itajtsin uan Jehová?... ¡Kema! Tla te tiktlakamati uan tiktlasojtla Jehová, tikchiuas ken iichpoch Jefté. Noijki sapanoa tikinyolpaktis motatajuan uan Jehová.