Owu wete okakadhona hono ke li methano?—  Okamwanakadhona komusamane Jefta. Ombiimbeli inayi ka tumbula kedhina, ihe otu shi kutya oka li ka nyanyudha he nosho wo Jehova. Ngashingeyi otwa hala okuka tseya nawa nosho wo he, Jefta.

Jefta okwa li omusamane e li nawa nokwa li ha longo aluhe omwanakadhona kombinga yaJehova. Okwa li wo omulumentu omunankondo nomuwiliki omwaanawa. Nomolwaashono Aaisraeli ya li ye mu pula e ya wilike mokukondjitha aatondi yawo.

Jefta okwa li a pula Jehova megalikano e mu kwathele a sindane. Jefta oku uvanekele Jehova kutya ngele okwa sindana, sho ta shuna kegumbo, ote ke mu pa omuntu gwotango ngoka ta zi megumbo lye. Omuntu nguka ota ka kala ha longele Kalunga  ketsalihangano onkalamwenyo ye ayihe. Etsalihangano olya li ehala hoka aantu ya li haya yi ya ka longele Kalunga pethimbo ndiyaka. Jefta okwa li a sindana. Owu shi kutya olye a zi mo tango megumbo sho Jefta a shuna kegumbo?— 

Eeno, okamwanakadhona. Jefta oko owala okanona a li e na hoka, nongashingeyi oku na okuka gandja po. Oshinima shika osha li she mu yemateke noonkondo. Ihe dhimbulukwa kutya okwa ninga euvaneko. Omwanakadhona okwe mu lombwele pethimbo opo tuu mpoka a ti: ‘Tate owu uvanekela Jehova, owu na oku shi ninga.’

Omwanakadhona gwaJefta naye okwa li a yemata. Ka li ta ka hokanwa nenge a mone aanona sho e li petsalihangano mpoka. Ihe okwa li a halelela okugwanitha po euvaneko lyahe nokunyanyudha Jehova. Shika osho sha li sha simana noonkondo kuye shi vulithe okuhokanwa nokumona aanona. Onkee ano, okwa yi a ka kale ketsalihangano onkalamwenyo ye ayihe.

Mbela oto dhiladhila kutya shoka a ningi osha nyanyudha Jehova nosho wo he?—  Ee, oshe ya nyanyudha. Ngele nangoye owa kala ho vulika nowu hole Jehova ngaashi omwanakadhona gwaJefta, oto ka nyanyudha aavali yoye nosho wo Jehova.