We onnamoona nahano va eruku ela?— Ola ti mwaana amwaamuthiyana a Yefita. Piipiliya hananleela nsina nawe, nnya ninnasuwela wi nahano ola aaheeriha wi tiithi awe ni Yehova ehakalale. Haya nihuserye vooloca sa nahano ola ni tiithi awe, Yefita.

Yefita aari mulopwana aphaama nave aanamaliha elukuluku yincipale amuhusihaka mwanawe amwaamuthiyana vooloca sa Yehova. Owo aari tho mulopwana awuupa ni muhooleli aphaama. Hiihaa Aisarayeli yaahimveka Yefita wi aahoolele mu owaniha ni amwiicani aya.

Yefita aavekela wi Muluku amukhaviherye wi avoothe. Yefita aaroromeliha wi wakhala wi oovootha, owo aahaala omvaha Yehova muchu oopacerya yoowo aahaala okhuma mpa mwawe vaavaa aahaaleiye okookela owaani. Muchu yoowo aahaala okhalaka mu mukocha wa Muluku ni olapa mwemmo okumi awe woothene. Mukocha  naari nipuro mwemmo khalai achu yaayaayawo omulapelamo Muluku. Aayi, Yefita aavootha ekhoco! We onnasuwela taani aapacenrye okhuma mpa mwawe vaavaa aakookenleiye owaani?—

Aayi, mwaana amwaamuthiyana a Yefita! Nahano ola aari mwanawe mmoharu pahi, nave vano Yefita aahaala omveleela ocai wene. Ela yaamweeriha othanana vancipale. Nnya wuupuwele, Yefita aapaka yoororomeliha. Moohilekela mwanawe amwaamuthiyana aaloca: ‘Tiithi mwaalipenle wa Yehova mukeerele ntoko olipela wanyu.’

Mwaana amwaamuthiyana a Yefita aathanana tho. Mu mukocha owo haaya otheliwa nari okhalano anamwane. Nnya nahano ola aanachuna waakhwaniherya yoororomeliha ya tiithi awe ni omuhakalaliha Yehova. Eyo yaari echu yookhweleyaxa wa nahano yoola opwaha otheliwa ni okhalano anamwane. Hiihaa owo aahiya echoko awe nave aakhala o mukocha okumi awe woothene.

We onuupuwela wi yeela nahano ola enreiye yaaheeriha wi tiithi awe ni Yehova ehakalale?— Aayi, awo yaahakalala! Wakhala wi onniiwelela nave onnamusivela Yehova, we onanwerya okhala ntoko mwaana amwaamuthiyana a Yefita. We onahaala weeriha tho wi asitiithi aa ni Yehova ehakalale vancipale.