Kitia nakai e koe e tama fifine he fakatino?— Ko ia ko e tama fifine he tagata ne higoa ko Iefeta. Nakai talahau he Tohi Tapu ki a tautolu haana higoa, ka e iloa e tautolu ne fakafiafia e ia haana matua taane mo Iehova. O mai ke fakaako hagaao ki a ia mo e haana matua taane ko Iefeta.

Ko e tagata mitaki a Iefeta ti lahi e magaaho ne fakaako haana tama fifine hagaao ki a Iehova. Ko e tagata malolō foki mo e ko e takitaki mitaki a ia. Ti ole he tau Isaraela a ia ke takitaki a lautolu ke tau ke he ha lautolu a tau fī.

Ne liogi a Iefeta ke he Atua ma e lagomatai ke kautū. Ti taute e Iefeta e maveheaga kaeke ke kautū a ia, to foaki age e ia ki a Iehova e tagata ka hu mai mua ki fafo he haana fale ka liu a ia ki kaina. Ko e tagata  nei to nofo mo e gahua ke he fale uta fano he Atua ke he moui katoa haana. Ko e fale uta fano he tutūutaaga ko e matakavi ke ō e tau tagata ke tapuaki ke he Atua he magahala ia. Ne kautū mooli a Iefeta he tau! Iloa nakai e koe ko hai ne hau mua ki fafo he fale haana he magaaho ne liu a ia ki kaina?—

E, ko e tama fifine ha Iefeta! Ko e tama ni a ia haana, ti ko e fakafano atu fai e Iefeta a ia. Ne momoko lahi a ia ha ko e mena nei. Ka e manatu, kua fitā he taute e ia e omonuo po ke maveheaga. Magaaho ia ni, ne ui e tama fifine haana: ‘Haaku matua na e, kua taute tuai e koe e maveheaga ki a Iehova, ti lata ni ia koe ke fakamooli ai.’

Ne momoko foki e tama fifine ha Iefeta. He fale uta fano, nakai maeke a ia ke fai taane mo e fai tama. Ka e manako lahi a ia ke fakamooli e maveheaga he haana matua taane mo e ke fakafiafia a Iehova. Ti uho lahi e mena nei ki a ia mai he fai taane po ke fai tama. Ne toka e ia haana kaina mo e nofo he fale uta fano ke he moui katoa haana.

Manatu nakai a koe kua fakafiafia e ia e matua taane haana mo Iehova ha ko e mena ne taute e ia?— E, fakafiafia! Kaeke kua omaoma mo e fakaalofa a koe ki a Iehova, maeke a koe ke tuga e tama fifine ha Iefeta. To fakafiafia pihia e koe haau a tau matua mo Iehova.