Na o a mmona mosetsana yo a lego mo seswantšhong?— Ke morwedi wa monna yo a bitšwago Jefeta. Beibele ga e re botše leina la gagwe, eupša re a tseba gore o ile a thabiša tatagwe le Jehofa. Anke re ithute ka yena le ka tatagwe e lego Jefeta.

Jefeta e be e le monna wa go loka e bile o be a fetša nako e ntši a ruta morwedi wa gagwe ka Jehofa. Le gona e be e le senatla le moetapele wa kgonthe. Ka gona Baisiraele ba ile ba mo kgopela gore a ba etelele pele go yo lwa le manaba a bona.

Jefeta o ile a rapela Modimo gore a mo thuše go fenya. Jefeta o ile a holofetša Jehofa gore ge a ka fenya, o tla mo nea motho wa pele yo a tlago go tšwa ka ntlong ya gagwe go tlo mo gahlanetša. Motho yoo o be a tla šoma taberenakeleng ya Modimo le  go dula moo bophelo bja gagwe ka moka. Taberenakele e be e le lefelo leo batho ba bego ba etla go lona go rapela Modimo mehleng yeo. Jefeta o ile a fenya ntwa! Ge a boa gae, na o a tseba gore ke mang yo a ilego a tšwa pele ka ntlong ya gagwe?—

Ee, go ile gwa tšwa morwedi wa Jefeta! E be e le yena ngwana a nnoši wa gagwe gomme gona bjale Jefeta o be tla swanelwa ke go mo iša taberenakeleng. Se se ile sa kweša Jefeta bohloko kudu. Eupša gopola gore o be a holofeditše Modimo selo se itšego. Gateetee morwedi wa gagwe o ile a re: ‘Tate, o holofeditše Jehofa, bjale o swanetše go dira seo o mo holofeditšego sona.’

Morwedi wa Jefeta le yena o be a kwele bohloko. Kua taberenakeleng, o be a ka se nyalwe goba go ba le bana. Eupša o be a nyaka go phetha kholofetšo ya tatagwe le go thabiša Jehofa. Seo se be se le bohlokwa kudu go yena go feta go nyalwa goba go ba le bana. Ka gona o ile a tloga gae gomme a yo dula taberenakeleng bophelo bja gagwe ka moka.

Na o nagana gore seo a ilego a se dira se ile sa thabiša tatagwe le Jehofa?— Ee, se ile sa ba thabiša! Ge e ba le wena o ekwa e bile o rata Jehofa, o ka swana le morwedi wa Jefeta. Le wena o tla dira gore batswadi ba gago le Jehofa ba thabe kudu.