EISHOMO 4
Akashemeza Ishe Hamwe na Yehova
Yefusa ariyo naaraganisa ki Yehova?
Muhara wa Yefusa akakora eki ishe yaaraganiise n’obu kiraabe kyabaire kitoorobi
Nooreeba omwishiki ogu omu kishushani?— Ni muhara wa Yefusa. Baibuli terikugamba eiziina rye, kwonka nitumanya ngu akashemeza ishe hamwe na Yehova. Ka twegye ebirikumukwataho hamwe na ishe Yefusa.
Yefusa akaba ari omushaija murungi kandi akaba akira kwegyesa omuhara ebirikukwata ahari Yehova. Akaba ari omushaija emanzi kandi omwebembezi murungi. Abaisraeli bakamushaba kubeebembera kuza kurwanisa abazigu baabo.
Yefusa akashaba Ruhanga kumuhwera kusingura. Akaraganisa ngu ku araasingure, naija kuha Yehova omuntu oraabanze kuruga omu nju ye kumubugana. Nikimanyisa ngu omuntu ogu ebiro byona akaba naija kutuura aha hekalu naaheereza. Hekalu gukaba guri omwanya ogu abantu baabaire baramizamu Ruhanga omu bunaku obwo. Yefusa akasingura orugamba! Noomanya owaabandize kushohora obu Yefusa yaahika omu ka?—
Akaba ari muhara wa Yefusa. Niwe mwana wenka ou yaabaire aine, kandi Yefusa akaba aine kumuhayo. Ekyo kikamusaasa munonga. Kwonka ijuka ngu akaba yaaraganiise. Ahonaaho, omuhara akagira ati: ‘Taata, ku oraabe oraganiise Yehova, oine kukihikiiriza.’
Banywani ba muhara wa Yefusa bakaba baija kumureeba buri mwaka
Muhara wa Yefusa nawe akashaasha. Ahakuba akaba atarikwija kushwerwa nari kuzaara. Kwonka akaba naayenda kuhikiiriza eki ishe yaaraganiise kandi akashemeza na Yehova. Kandi ekyo nikyo yaabaire naatwara nka kikuru okukira okushwerwa nari okuzaara abaana. N’ahabw’ekyo akaruga omu ka yaabo yaatuura aha hekalu ebiro byona.
Noogira ngu eki yaakozire kikashemeza ishe hamwe na Yehova?— Buzima, ekyo kikabashemeza! Waaba nookunda Yehova kandi orikumworobera noija kuba nka muhara wa Yefusa. Naiwe noija kushemeza abazaire baawe hamwe na Yehova.
