Weetst du, wäa de kjliene Mejal hia oppem Bilt es? – Daut es Jefta siene Dochta. De Schreft sajcht ons nich, woo see heet, oba dee sajcht, daut äare Pape un uk Jehova sea tofräd sent met ar. Wurscht du jleichen, een bät mea äwa Jefta un siene Dochta to weeten?

Jefta es een feina Maun. Hee es väl met siene Dochta toop un lieet dee äwa Jehova. Hee es uk een stoakja Maun, dee daut Volkj vesteit to leiden. Doawäajen wellen de Israeliten haben, daut hee an em Kjrich jäajen äare Fiend leiden saul.

Jefta frajcht Gott no Help. Un hee vesprakjt Jehova waut, wan dee am halpt to jewennen. Hee sajcht: “De ieeschta, waut mie von mien Hus entjäajen kjemt, wan ekj vom Kjrich trigjkom, dee saul Jehova  jehieren.” Deejanja saul dan sien gaunzet Läwen bie daut Aunbädungszelt schaufen un wonen. Daut Aunbädungszelt es de Städ, wua de Menschen hangonen, Gott auntobäden. Soo aus wie weeten, jewent Jefta dän Kjrich. Waut jleefst du, wäa kjemt Jefta daut ieeschte entjäajen, aus hee no Hus kjemt? –

Daut es siene Dochta! Jefta haft bloos dit eene Kjint, un nu saul hee daut nom Aunbädungszelt schekjen. Daut moakt Jefta sea truarich. Oba hee haft Jehova sien Wuat jejäft. Doawäajen sajcht siene Dochta fuaz: “Pape, wan daut soo es, dan doo met mie, waut du vesproaken hast.”

Jefta siene Dochta moakt daut uk truarich. Bie daut Aunbädungszelt woat see sikj nich kjennen befrieen un Kjinja haben. Oba see well sikj aun daut hoolen, waut äare Pape Jehova vesproaken haft. Daut Jehova sikj freit, es fa ar wichtja, aus sikj befrieen un Kjinja haben. Soo jeit see von tus un schauft äa Läwen lank bie daut Aunbädungszelt.

Waut denkjst du, es äare Pape un uk Jehova tofräd met ar? – Gaunz secha. Un du kaust uk soo sennen aus Jefta siene Dochta. Wan du Jehova leefst un jehuarsom best, woat Jehova met die sea tofräd sennen. Un Mame un Pape woaren sikj uk freien.