سبق 4
اِفتاح دی دھی نے اپنے باپ تے یہوواہ خدا نُوں خوش کیتا
اِفتاح یہوواہ خدا نال کیہہ وعدہ کر رہے نیں؟
اِفتاح دی دھی اپنے ابو توں دُور نئیں جانا چاہندی سی پر فیر وی اوہ خیمۂاِجتماع چ خدمت کرن چلی گئی۔
کیہہ توانوں تصویر چ اِک چھوٹی کُڑی نظر آ رہی اے؟— ایہہ اِفتاح دی دھی اے۔ بائبل چ ایس کُڑی دا ناں نئیں دسیا گیا۔ پر بائبل دسدی اے کہ ایس کُڑی نے اپنے ابو تے یہوواہ خدا نُوں خوش کیتا۔ آؤ، اَسی ایس کُڑی تے ایہدے ابو دے بارے کہانی پڑھیے۔
اِفتاح اِک بوہت بھلے آدمی سن۔ اوہناں نے اپنی دھی نُوں یہوواہ خدا دے بارے بوہت ساریاں گلاں سکھائیاں سن۔ اِفتاح بوہت دلیر سن۔ ایس لئی بنیاِسرائیل نے اوہناں نُوں اپنا سردار بنا لیا تے اوہناں نُوں کہیا کہ تُسی ساڈے دُشمناں نال جنگ کرو۔
اِفتاح نے جنگ جتن لئی خدا اَگے دُعا کیتی۔ اوہناں نے یہوواہ خدا نال وعدہ کیتا کہ جے مَیں جنگ جت گیا تے جیہڑا سب توں پہلے میرے گھروں نکل کے مینوں مِلن آئے گا، اوہنوں مَیں تینوں دے دواں گا۔
ایہدا مطلب سی کہ جیہڑا اِفتاح نُوں سب توں پہلے ملے گا، اوہ ساری زندگی خیمۂاِجتماع وچ یہوواہ خدا دی خدمت کرے گا۔ خیمۂاِجتماع اوہ جگہ سی جِتھے بنیاِسرائیل یہوواہ خدا دی عبادت کردے سن۔ یہوواہ خدا نے اِفتاح دی مدد کیتی تے اوہ جنگ جت گئے۔ کیہہ توانوں پتہ اے کہ جدوں اِفتاح گھر گئے تے سب توں پہلے کون اوہناں نُوں مِلن آیا؟—اوہناں دی دھی! اوہ اِفتاح دی اِکلوتی اولاد سی۔ تے ہُن اوہناں نے اپنی دھی نُوں بوہت دُور گھلنا سی۔ ایس کر کے اِفتاح بڑے اُداس سن۔ پر اوہناں نے یہوواہ خدا نال وعدہ کیتا ہویا سی۔ ایس لئی اوہناں دی دھی نے کہیا: ابو، تُسی یہوواہ خدا نال وعدہ کیتا اے۔ اپنا وعدہ ضرور پُورا کرو۔
اِفتاح دی دھی دیاں سہیلیاں ہر سال اوہنوں مِلن آؤندیاں سن۔
اِفتاح دی دھی وی بڑی اُداس سی۔ خیمۂاِجتماع چ خدمت کردیاں اوہ شادی نئیں کر سکدی سی تے نہ ای اولاد دا سُکھ پا سکدی سی۔ اوہ اپنے ابو دا وعدہ پُورا کرن دے نال نال یہوواہ نُوں وی خوش کرنا چاہندی سی۔ اِفتاح دی دھی لئی ایہہ گلاں سب توں زیادہ ضروری سن۔ ایس لئی اوہ اپنے ابو نُوں چھڈ کے خیمۂاِجتماع چلی گئی تے ساری زندگی اوتھے یہوواہ خدا دی خدمت کردی رہی۔
کیہہ اِفتاح دی دھی نے یہوواہ نُوں تے اپنے ابو نُوں خوش کیتا؟— ہاں، بالکل۔ جے تُسی اپنے امیابو دا کہنا من دے او تے یہوواہ خدا نُوں پیار کردے او تے تُسی وی اِفتاح دی دھی وانگوں بن سکدے او۔ ایس طرحاں تُسی یہوواہ خدا تے اپنے امیابو نُوں خوش کر سکدے او۔
ایہہ ایتاں پڑھو:
-
اِستثنا 6:4-6
-
قضاۃ 11:30-40
-
1-کُرنتھیوں 7:37، 38