¿La kachʼobʼo jachin laʼ ri alaj ali che kʼo pa ri wachbʼal?... Kʼo ta ri ubʼiʼ pa ri Biblia, xaq xiw ri ubʼiʼ ri utat, are Jefté. Ri Jehová xuqujeʼ ri Jefté sibʼalaj xekikotik rumal jun jastaq che xubʼan ri ali. ¿La kawaj kawetaʼmaj chrij ri Jefté xuqujeʼ chrij ri umiʼal?

Ri Jefté are jun utzalaj achi. Xukoj uqʼij che ukʼutik ri utzij ri Jehová chuwach ri umiʼal. Xuqujeʼ are jun achi ko ranimaʼ kkun che ukʼamik ubʼe ri tinamit. Rumal laʼ ri israelitas xkibʼij che: «¿La kawaj kakʼam qabʼe pa ri chʼoj?».

Ri Jefté xutaʼ che ri Jehová che kutoʼ che uchʼakik ri chʼoj. Xubʼij che ri Jehová che we kchʼakanik kubʼan waʼ: chiʼ ktzalij lo pa ri rachoch, ri nabʼe winaq che kel lo che ukʼulaxik kuya che ri Jehová. ¿Jas kraj kubʼij waʼ? Kraj kubʼij che ri winaq riʼ kchakun  pa rachoch ri Dios xuqujeʼ kkʼojiʼ chilaʼ pa ronojel ukʼaslemal. Ri rachoch Dios are ri lugar ri keʼopan wi ri winaq che uyaʼik uqʼij ri Jehová. ¿La xchʼakan ri Jefté? Xchʼakanik. Are taq xtzalij lo pa rachoch, ¿la awetaʼm jachin xel lo che ukʼulaxik?...

¡Are ri umiʼal! Are kʼu xa jun ri umiʼal kʼolik, rajawaxik che Jefté kutaq bʼi pa ri rachoch ri Dios. Sibʼalaj xbʼisonik, are kʼu utzujum chi che ri Jehová, ¿la knaʼtaj chawe jas ri xutzujuj? Rumal laʼ, ri ali xubʼij che ri utat: «Tat, xabʼij che ri Jehová che kaya che, ri winaq che kel loq, chabʼanaʼ ri xabʼij».

Ri ali xuqujeʼ xbʼisonik. ¿Jasche? Rumal che ri kechakun pa ri rachoch ri Dios, kekun taj kekʼuleʼik xuqujeʼ kkʼojiʼ ta kalkʼwal. Are kʼu ri areʼ kraj kubʼan ri xubʼij ri utat. Xuqujeʼ kraj kukikotemaj ri Jehová. Wariʼ are más nim ubʼanik chuwach ri ali are ta ri kʼulanem o ri akʼalabʼ. Rumal laʼ xbʼe pa ri rachoch Dios xuqujeʼ xkanaj chilaʼ kʼa pa ri ukamikal.

¿Jas kachomaj, la xkikot ri Jehová xuqujeʼ ri Jefté rumal ri xubʼan ri ali?... ¡Sibʼalaj xekikotik! At xuqujeʼ katkunik kabʼan awe junam rukʼ ri umiʼal ri Jefté. We katnimanik xuqujeʼ we kaloqʼoqʼej ri Jehová, areʼ sibʼalaj kkikot riʼ awukʼ. Xuqujeʼ ri atat ri anan sibʼalaj kekikot riʼ awukʼ.