¿Yachankichu kay dibujopi warmacha pi kasqanta? . . . Bibliaqa manam ninchu sutintaqa, ichaqa ninmi taytanpa sutin Jeftey kasqanta. Jehova Dios hinaspa Jefteymi kusisqa tarikurqaku paypa ruwasqanwan. ¿Munawaqchu astawan yachayta Jefteymantawan churinmanta?

Jefteyqa allin runam karqa. Tiempochakuqmi Jehova Diosmanta churinman yachachinanpaq. Chaymantapas, llaqtapi runakunatam allinta kamachiq. Chaymi Israel runakuna nirqaku: “Hakuchikyá jefeyku kanaykipaq”, nispa.

Jefteymi Jehova Diosta mañakurqa peleaptinku yanapananpaq. Venceruptinkuñataqmi, wasinman kutiptin punta lloqsimuq runa Jehova Diospaq kanan karqa. ¿Imatam kaywanqa niyta munachkarqa?  Chay punta lloqsimuq runam wañukunankama Diospa karpanpi yachaspan llamkanan karqa. Jehova Diosta yupaychanankupaqmi runakunaqa chay karpaman riqku. ¿Jefteyqa vencerqachu peleasqankupi? Arí. ¿Yachankichu pim puntata taripaqnin lloqsimusqanta? . . .

¡Churinmi! Jefteypaqa hukllam warmi churin karqa. Paymi Diospa karpanpi yachanan karqa. Chaywan llakisqa tarikuspanpas, chayta ruwananpaqmi Jehova Diosta nirqa. ¿Yuyachkankichu ima nisqanta? Churinqa kaynatam nirqa: “Taytáy, [Jehova] Diosman prometekusqaykiman hinayá ruway”, nispa.

Paypas qallariypiqa llakisqam tarikurqa. ¿Imanasqa? Diospa karpanpi yachaspanqa, manam casarakunanchu karqa nitaq wawanpas kananchu karqa. Paymi ichaqa taytanpa prometekusqanta cumpliyta munarqa. Chay ruwaytam payqa munarqa mana casarakunan kaptinpas otaq mana wawayoq kanan kaptinpas. Chaymi Diospa karpanpi wañukunankama yacharqa.

¿Jehova Dioswan Jefteyqa kusisqachu karqaku paywan? . . . ¡Kusisqamá karqaku! Qampas atiwaqmi Jefteypa churin hina kaytaqa. Diosta kuyaspayki kasukuptikiqa, payqa qanwanpas kusisqam kanqa chaynataq tayta-mamaykipas.