Cai uchillagu ¿pi cajta yachanguichu?... Paipa shutita Bibliapi na nishpapash Jeftepa ushigu cajtami nin. Paimandaca Jehovapash Jeftepash ninandami cushijurca. ¿Jeftemanda paipa ushigumandapash yachajungapaj munanguichu?

Jefteca paipa ushiguman Jehovamanda yachachishpami causarca. Paica ninan fuerzayu, llactata ali mandajmi carca. Israelitacunaca contracunata mishangapami Jefté ñaupajman pushachun mañarca.

Jefteca contracunata mishangapaca Jehovapa ayudatami mañarca. Ayudajpica ñuca huasiman tigrajujpi tuparingapaj primero llujshijtami Jehovaman cusha nircami. Shinaca tuparingapaj primero llujshijtami  huañui punllacaman Diospa tabernaculopi sirvishpa chai ladolla causachun cachana carca. Tabernaculoca Diosta adorana pushtumi carian. Jefteca contracunata misharcami. Shinaca ¿pishi paita tuparingapaca primero llujshimurca?...

Paipa shujlla ushigumi tuparimurca. Shinaca paitami Jefteca tabernaculopi sirvichun cachana carca. Ninanda llaquirishpapash Diosman imata nishcataca na cungarcachu. Chaimandami Jeftepa ushiguca nirca: “Papito, Diosman cusha nishcataca pactachinapachami cangui” nishpa.

Tabernaculopi sirvijushpaca cazaraitapash, huahuata charinatapash na ushana cashpami Jeftepa ushigupash llaquilla sintirirca. Shinapash paipa taita nishcata pactachingapami munarca. Jehovapash cushijuchun munashpami, cazaranatapash huahuata charinatapash ladoman saquishpa, huañui punllacaman Diospa tabernaculopi sirvingapaj rirca.

Paipa ushigu shina rurajpica Jeftepash Jehovapash ¿imashinashi sintirirca?... Cushijuriangami. Canbash Jeftepa ushigushna caita ushanguimi. Tucuipi cazujpi, paita juyajpica Jehová Diosca ninandami cushijunga. Papitopash mamitapash cushijungami.