Cai dibujuibi auc huahuata ricsinguichu... Bibliaga mana rimanzhu pai shutita. Chasna acpihuas cuintanmi, pai yaya Jefté acta. Sallata Jehova, Jeftehuas pai alita rashcamandami cushiyanaura. Jeftemanda, paiba ushimandas mas yachanata munanguichu.

Jeftega ali shungu runa mara. Jeftega Jehovamanda caran uras paiba ushita yachachic ara. Chasnallata sinzhi runa ashcamanda Israel runagunata pushanata yachara. Chiraicu Israel runagunaga tapunaura: “Guerraibi ñucanchita pushac tucuna munanguichu” nisha.

Jeftega, guerraibi binsingahuaga Jehovatami yanapahuai nira. Jehova yanapacpiga, huasima bulltiashcai, punda tupangahua llucshic runata Jehovata cusha nira. Chi runaga imatata rana ara. Chi Jefté cushca runaga  Diosta alabana carpa huasibi tarabasha causana mara. Jeftega chi guerraibi binsirachu. Indá. Pita punda llucshira. Yachanguichu...

Paiba shuglla ushimi llucshira. Cunanga Jeftega Diosta alabana carpa huasima paiba ushita cachana mara, chibi causachun nisha. Chiraicumi Jeftega ashcata llaquirira. Chasna llaquirishahuas, Jeftega pai rimashcata pactachina mara. Chiraicumi paiba ushiga nira: “Yaya, can Jehovata cusha nishcata pactachina mangui” nisha.

Chi ratu paiba ushiga llaquirirami. Imaraicuta llaquirira. Diosta alabana carpa huasibi causashaga, mana cadsarana, mana huahuagunata charina chara. Chasna acpihuas, paiba yaya rimashcata pactachinata munara. Cadsarasha huahuagunata charina randiga Jehovata cushiyachinatami mas munara. Chiraicumi paiga Diospa huasibi causangahua rira.

Imatata yuyangui, Jehova, Jeftehuas paimanda cushiyanaurachu... Indá. Canhuas Jeftehua ushi shina ana mangui. Can Jehovata ashcata llaquic, cadsuc ashaga, paita cushiyachinguimi. Chasnallata camba yayagunas cushiyangaunami.