¿E tikeꞌa rō ꞌā koe i te poki vahine i ruŋa i te hohoꞌa?... A īa he poki a Jefté e toꞌona ꞌīŋoa ꞌina he eꞌa i ruŋa i te Puka o te ꞌAtua. A īa ko haka koa ꞌā i a Iehoha e i toꞌona matuꞌa tane. ¿Haŋa rō koe mo ata aŋi⁠-⁠aŋi o ruŋa i a Jefté e o ruŋa i taꞌana poki vahine?

A Jefté he taŋata riva. Taꞌana meꞌe haŋa he hāpī ki taꞌana poki o ruŋa o Iehoha. A īa he taŋata pūai, haka kē, maramarama mo haka tere i te taŋata. Oīra te Israelita i nonoꞌi ai mo puꞌoko i a rāua mo te tamaꞌi.

He pure e Jefté ki a Iehoha mo haꞌūꞌū mo rē i te tamaꞌi. E he kī mo rē ꞌoꞌona, he vaꞌai e īa i te taŋata raꞌe ka eꞌa mai era mai toꞌona hare mo aroha ki a īa. Te taŋata raꞌe ka eꞌa mai ena, he noho he aŋa i roto i te  karapā o Iehoha ki toꞌona mate iŋa. Te karapā o Iehoha he kona e tahi e oho era te taŋata mo pure ki te ꞌAtua. I oho era, he rē a Jefté i te tamaꞌi. ¿Haŋa rō koe mo ꞌite ko ai te meꞌe raꞌe i eꞌa ki a īa mo aroha?...

¡Ko tū poki era ꞌaꞌana i eꞌa raꞌe ai! He ꞌoti mau ꞌā te poki a Jefté. He mamāe toꞌona mahatu o te vaꞌai i taꞌana poki mo oho ki tū karapā era, mo aŋa tū vānaŋa kī era ki a Iehoha. He kī ia e tū poki vahine era: “E koro, mo ai ko kī ꞌā koe i taꞌa vānaŋa ki a Iehoha, e aŋa koe peira”.

I mamāe takoꞌa rō tū poki vahine era. I te meꞌe era ka noho era i te karapā, ꞌina e ko riva mo haīpoīpo e mo ai taꞌana ŋā poki. Ko haŋa ꞌā īa mo aŋa i te meꞌe kī era e toꞌona matuꞌa tane e takoꞌa, ko haŋa ꞌā mo haka koa i a Iehoha. Moꞌona ata nui⁠-⁠nui rā aŋa ki te haīpoīpo e ki te ai te ŋā poki. Oīra i haka rē ai toꞌona hare e he oho he noho rō ai i tū karapā era, ki toꞌona mate iŋa.

¿I haka koa rō e īa i a Iehoha e i toꞌona matuꞌa tane?... E ē, i aŋa rō peira. Mo ai e here ꞌe e haka roŋo rō ꞌā koe ki a Iehoha e riva nō koe mo tuꞌu pahe poki era a Jefté. Mo aŋa koe peira, he haka koa koe i a Iehoha e peira ꞌā ki tuꞌu matuꞌa.