Dikhes la sha po kipo? (. . .) E Biblia chi phenel la shako anav, de kado zhanas hoj kamlas te anel lossh peske dadeske thaj vi le Jehovaske. Lako dad o Jefte sas. Phinzhar len majfeder.

O Jefte lasho manush sas. Butivar sityardas peska sha pal o Jehova. Zuralo manush sas. Anda kadi le izraeliti mangle les, hoj te zhal anglal, kana zhan ando maripe.

O Jefte rudyisardas karing o Jehova, te zhutil lenge. Phendas variso le Jehovaske. Tele te maren le xolyarden, atunchi leske del varikas, kon anglunes avri avel ando kher, kana o Jefte khere zhal. Vi kodo phendas, hoj kodo varikon sorro trajo solgila le Jehovas kaj o sunto cerha.  O sunto cerha kasavo than sas, kaj le manusha dulmut solgisardine le Devles. O Jefte tele mardas peske xolyarden! So gindines, kon avilas avri anglunes anda o kher, kana voj khere gelas? (. . .)

Le Jefteski shej! Numa kadi jekh shej sas les, thaj akanak trubul te bishavel la. O Jefte zurales brigako sas. De zhanglas kodi, hoj colax das. Atunchi leski shej kadi phendas: „Muro dad, colax te dan le Jehovaske, inker tyi vorba.”

Vi le Jefteski shej brigaki sas. Zhanglas, hoj kon solgil kaj o sunto cerha, nashtig zhal romeste, thaj chi avna la shavora. Voj kamlas peske dadeski colax te inkrel, thaj te losshal lake o Jehova. Kodo majfeder kamlas, sar te avel la családo. Anda kado muklas pesko kher, thaj zhikaj trajilas kaj e sunto cerha sas.

So gindines, losshajlas o Jefte thaj o Jehova, so e shej kerdas? (. . .) Ova, zurales! Te shunes e vorba, thaj kames le Jehovas, kasavo shaj aves, sar le Jefteski shej. Tyire dadeske thaj tyire dake thaj vi le Jehovaske but lossh anes.