Misilete aana qaaqqo leeltannohe?— Ise Yoftahe yinanni manchite. Qullaawu Maxaafi ise suˈma dikulanno, ikkirono ise annasenna Yihowa hagiirsiissinota anfoommo. Hanni isetanna annise Yoftahe xagge ronso.

Yoftahe dancha manchooti; isi qaaqqosira Yihoware dancha gede rosiise lossiˈrino. Qoleno isi worbahonna dancha sooreessaati. Konni daafira Isiraeele diinnansa ledo olamate kaaˈlannonsa gede kuˈlitu.

Yoftahe ola qeelate Magano huucciˈri. Qoleno konne ola qeelummoro, qeele higeemmo wote miniˈyanni balaxe fule haarannoeha Yihowara eemmo yee xano xaˈnino. Kuni Maganoho uyinanni manchi hatte yannanni jammare  xaadooshshu dunkaanira Maganoho calla soqqamanni heeˈranno. Xaadooshshu dunkaani, hakkawaro mannu Magano magansiˈrara haˈranno bayichooti. Yoftahe olame qeele higi! Olu basenni qae higi wote haarasira minisinni balaxe fulinohu ayetiro afootto?—

Balaxxe fultinoti beettosiiti! Isira noosi qaaqqo ise callaati; ise xaate Yoftahewiinni baxxite heedharaati. Hakko daafira isi lowo geeshsha dadillino. Kayinni wonanni eemmo yee kaino. Beettosi hakkawontenni togo yitusi: ‘Anna, Yihowara wonanni coyidhe kaootto; hakko daafira yoottore wonshite aguri.’

Yoftahe beettono lowo geeshsha dadillitino. Ise xaadooshshu dunkaanira heedhe mine assiˈranna ooso ila didandiitanno. Ikkirono annise xano wonshite Yihowa hagiirsiisa lowonta hasidhino. Ise mine assiˈrantenni woy ooso ile lossiˈrantenni tenne assa hasidhino. Konni daafira qaensanni agurte hadhe xaadooshshu dunkaanira heeˈra jammartu.

Ise assitinori annasenna Yihowa hagiirsiisinoha lawannohe?— Ee, hagiirsiisino! Atino hajajamattohanna Yihowa baxattoha ikkiro, Yoftahe beetto gede ikkatto. Atino annakkino amakkino, Yihowano lowo geeshsha hagiirsiisatto.