Yu e si a meisje na tapu a prenki?​— A meisje disi na a umapikin fu wan man di nen Yefta. Bijbel no e taigi wi fa a meisje disi nen. Ma wi sabi taki a meki en papa breiti èn a meki Yehovah breiti. Meki wi taki fu a meisje èn fu en papa, Yefta.

Yefta ben de wan bun man èn a ben e leri en meisje furu fu Yehovah. A ben de wan tranga man èn a ben koni tu. Dati meki den Israelsma aksi en fu yepi den feti nanga den feanti fu den.

Yefta begi Gado fu yepi en wini a feti. Yefta pramisi Yehovah taki efu a ben o wini a feti, dan a ben o gi Yehovah a fosi sma di komoto na ini en oso, te a drai kon baka. A sma disi ben o wroko en heri  libi langa na a tabernakel fu Gado. A tabernakel ben de wan presi pe sma ben anbegi Gado na a ten dati. Yefta wini a feti! Yu sabi suma na a fosi sma di komoto na ini Yefta oso, di a drai kon baka?​—

Iya, a ben de na umapikin fu Yefta! A ben de a wan-enkri pikin di Yefta ben abi. Ma now Yefta ben musu seni en go na a tabernakel. Disi ben meki Yefta firi sari. Ma yu sabi ete taki a ben pramisi Yehovah wan sani? En meisje taki wantewante: ’Papa, yu pramisi Yehovah wan sani èn yu musu du san yu pramisi.’

A meisje fu Yefta firi sari tu. Te a ben o tan na a tabernakel, dan a no ben o man trow èn kisi pikin. Ma a ben wani du san en papa pramisi èn a ben wani meki Yehovah breiti. A ben feni dati moro bun leki fu trow èn kisi pikin. Dati meki a gowe libi en papa oso èn a tan na a tabernakel en heri libi langa.

Yu denki taki a sani di a du meki en papa nanga Yehovah breiti?​— Iya, seiker! Yu musu arki yu papa nanga yu mama èn yu musu lobi Yehovah neleki na umapikin fu Yefta. Te yu e du dati, dan yu papa nanga mama o breiti! Èn Yehovah o breiti tu.