Je, unamwona msichana katika picha hii?— Msichana huyu ni binti ya mwanaume fulani aliyeitwa Yeftha. Biblia haitaji jina lake, lakini tunajua kwamba alimfurahisha baba yake na Yehova pia. Sasa, ngoja tujifunze mambo fulani yanayomhusu binti huyo na baba yake, yaani, Yeftha.

Yeftha alikuwa mtu mzuri, na alitumia muda mwingi sana ili kumfundisha mtoto wake kuhusu Yehova. Pia, Yeftha alikuwa mwanaume mwenye nguvu na kiongozi mzuri. Kwa hiyo, Waisraeli wakamwomba Yeftha awaongoze wanapoenda kupigana na adui zao.

Yeftha alisali kwa Mungu ili amsaidie ashinde. Yeftha alimwahidi Mungu kwamba ikiwa atawashinda adui zake, basi atampa Yehova mtu wa kwanza atakayetoka nje ya nyumba yake atakaporudi nyumbani.  Mtu huyo ataishi na kufanya kazi kwenye maskani ya Mungu katika siku zote za maisha yake. Katika siku hizo, maskani ilikuwa mahali ambapo watu walienda ili kumwabudu Mungu. Basi mambo yalikuwa mazuri, Yeftha akawashinda adui zake! Je, unajua ni nani aliyekuwa wa kwanza kabisa kutoka katika nyumba yake aliporudi nyumbani?—

Bila shaka, alikuwa binti ya Yeftha! Huyo ndiye mtoto pekee wa Yeftha, na sasa Yeftha angepaswa kumruhusu aondoke nyumbani. Jambo hilo lilimsikitisha sana Yeftha. Lakini kumbuka kwamba alikuwa ametoa ahadi. Mara moja, binti yake akasema: ‘Baba, ulimwahidi Yehova, kwa hiyo ni lazima uitimize ahadi yako.’

Binti ya Yeftha alikuwa na huzuni pia. Kwani akiwa maskani, hangeweza kuolewa na kupata watoto. Hata hivyo, alitamani sana atimize ahadi ya baba yake na amfurahishe Yehova. Kufanya hivyo kulikuwa jambo la maana zaidi kwake kuliko kuolewa na kupata watoto. Kwa hiyo, akaondoka nyumbani kwao na kwenda kuishi katika maskani, akakaa huko siku zote za maisha yake.

Je, unafikiri jambo alilofanya lilimfurahisha baba yake na Yehova pia?— Bila shaka, baba yake, na Yehova walifurahi sana! Wewe pia, ukiwa mtiifu na ukimpenda Yehova kama binti ya Yeftha, basi utawafurahisha sana wazazi wako na Yehova pia.