Apa i kau nakasilo anạ wawine su gambarẹ̌?— I sie anạ i Yefta. Alkitapẹ̌ tawe nẹ̌bera i sai arenge, katewe i kitẹ masingkạ i sie někoạ naung i Papạ e dingangi Yehuwa mal᷊uasẹ̌. Ndaị e i kitẹ mẹ̌basa běkeng i Yefta dingangu anạ e.

I Yefta esẹ mapia, kụ i sie masauh měněntiro anạ e i sai Yehuwa. I sie lai matoghasẹ̌ dingangu pemimpin mapaelẹ̌. Hakị u ene, tau Israel němile si sie makoạ pemimpin perang.

Su tempong seng mẹ̌perang, i Yefta nědoa si Yehuwa tadeạu makauntung. I Yefta nẹ̌diandi, i sai kal᷊imona suměbang bọu wal᷊ene su tempong i sie mapul᷊ẹ bọu nẹ̌perang, taumata ene sarung gělikang  si Yehuwa. Taumata ene sarung mẹ̌tanạ su tabernakel sarang i sie mate. Tabernakel ene kai tampạ u tau Israel měngibadah su Mawu. Bọu ene i Yefta nakauntung! I kau masingkạ i sai siměbang kal᷊imona bọu wal᷊ene su tempong i Yefta napul᷊ẹ bọu nẹ̌perang?—

Iya, anạ i Yefta! Kětạeng ene anạe, kụ i Yefta harusẹ̌ měgělị anạ ene si Yehuwa. I Yefta nasusah naunge. Katewe, i sie seng nẹ̌diandi si Yehuwa. Bọu ene anạe nẹ̌bera: ’I Papạ seng nẹ̌diandi si Yehuwa, kụ apa seng niwerang i Papạ harusẹ̌ koạ.’

Anạ i Yefta lai nasusah naunge. Su tabernakel, i sie tawe botonge mẹ̌kawing arau piạ anạ. Katewe, i sie mapulu mẹ̌tul᷊ung si papạ e měkoạ apa seng niwera, kụ lai měkoạ naung i Yehuwa mal᷊uasẹ̌. Ene penting si sie bọu barang bal᷊inẹ, kere mẹ̌kawing arau piạ anạ. Hakị u ene, i sie siměbang bọu wal᷊e, kụ nẹ̌tanạ su tabernakel sarang i sie nate.

Mạeng si kau kerea, apa i sie někoạ naung i papạ e dingangi Yehuwa mal᷊uasẹ̌?— Iya, i sie někoạ naung i papạ e dingangi Yehuwa mal᷊uasẹ̌! Mạeng i kau matuhụ dingangu makěndagẹ̌ si Yehuwa, i kau makoạ kere anạ i Yefta. I kau lai sarung měkoạ naung i papạ, i mamạ, dingangi Yehuwa mal᷊uasẹ̌.