Trea’o vao o ajaja amo sareo iohoeke?... I Jefita ty agnara ty baba’e. Tsy rehafe ty Baiboly ty agnara’e, faie fantantikagne fa nampifale i Jehovah naho i baba’e reke. Andao tikagne hamantatse soa iareo aman-drae’e.

Soa fagnahy naho nagnanatse i ana’ey ty miomba i Jehovah ty Jefita. Naozatse naho nahay nitarike maramila ka reke. Izay ty nahavy o Isiraelitao nangatake aze ho lahibey ty maramila iareo hialy amy ze ndaty malaigne aze.

Nivavake tamy i Jehovah ty Jefita mba hagnampe aze haharese. Nampitamà i Jehovah reke fa ze ndaty miakatse voaloha’e hanalaka aze boake an-tragno’e ao, le homei’e i Jehovah. Hitoboke naho hiasa amy kivohon’Andrianagnaharey ao apara-pahafate’e o ndaty iohoeke. O kivoho zao tragno paralay (labasy) naoregne hivavahagne amy i Jehovah. Naharese vata’e ty Jefita! Fanta’o vao ty nanalaka aze voaloha’e naho fa niavy reke?...

Eka. I anak’ampela’ey. Ie raike avao ty ana’e faie mbe hisarake ama’e ka. Nanahelo mafe ty Jefita. Ao tsy ho haligno’o fa nanao vava reke. Nirehake i anak’ampela’ey tie: ‘O Baba fa nampitamà i Jehovah rehe, le efao i vava nanoe’oy.’

Nanahelo i Jefita ka i anak’ampela’ey. Tsy hanambaly naho tsy hanagne anake sasa reke naho fa mitoboke amy i kivohoy ao. Faie te hagnefa i vava nanoen-drae’ey naho te hampifale i Jehovah reke. Ndra aleo’e reke tsy nanam-baly, tsy nanagne anake ta tie tsy hampifale i Jehovah naho i rae’e. Nienga i tragno iareoy reke, le nitoboke amy kivohoy agne apara-pahafate’e.

Akore ty heve’o, nahafale i Jehovah naho i baba’e vao ty raha nanoe’e?... Eka, nampifale aze! Naho magnorike ty fagnanara i Jehovah manahake i anak’ampela i Jefitaay ka rehe, le ho fale ty Baba naho i Nene vaho i Jehovah.