Kiseseni ijo apese kotoma aputo?— Erai nges akoke etunganan lo enyaritai Yeputa. Mam Ebaibuli kitijenikit oni ekekiror, Konye ijeni oni ebe abu kisialamik papake keda Yawe. Aso kesisiautu nuikamunitos nges keda papake, Yeputa.

Arai Yeputa etunganan loajokuna lo abu kitosom akepak aisisianakina akoke nuikamunitos Yawe. Arai bobo nges etunganan lo agogong ka engarenon lokajokan. Apotu do isirailin kingitutu nges aingarenikin kesi aitiji lukasurup kec.

Abu Yeputa kilip aingarakinio kanejai Edeke kanu nges aitelekar. Abu do Yeputa kisumun ebe arai kiteleka, ebuni aijaikin Yawe itunganan yen sodit alomun kotogo ke nebongora nges ore. Ebuni  itunganan yen aijaanakin toma koyekalu Loka Edeke aijar ke ikar kere. Arai eyekalu aiboisit na alosenenete itunga aima Edeke. Eebo, abu Yeputa kiteleka! Ne abongoria ore, Ijeni ijo itunganan yen sodit alomun kotogoke ne abongoria nges ore?—

Eebo, arai akoke Yeputa! Arai nges ikekoku idiopet bon, ido kwana abeit Yeputa ajalakin nges alosit. Kitakadikisi ngun nges noi. Konye kiitu ebe, adaunit nges aisumun. Katipet, kotema akoke ebe: ‘Papa, kobu ijo kisumunite Yawe, aso ebeit ijo aitodolikin.’

Apotu nu kitakadikisi akoke Yeputa da noi. Koyekalu, mam nges apedori adukokin karaida auri idwe. Konye akoto nges aitodolikin aisumunet ka papake keda aisialamikin Yawe. Ngun nges apolok noi kanejai nges adepar adukokin ka auri idwe. Aso abu konyou kore kosodi aiboi koyekalu ikar luka aijar ke kere.

Kiwomit ijo ebe nukabu nges kiswama apotu kisialamikisi papake keda Yawe?— Eebo, teni! Arai kirimarit ijo ka amina Yawe ipedori ijo aputor akoke Yeputa. Ijo da ibuni aisialamikin auriak kon ka Yawe noi.