Ulimubwene na musimbi ulii mucifwanikisyo?— Mwana musimbi wamwaalumi utegwa Jefita. Izina lyakwe talilembedwe pe muBbaibbele, pesi ncituzi ncakuti wakabotezya wisi aJehova. Atwiiye zyiingi atalaa nguwe awisi, Jefita.

Jefita wakali mwaalumi uuli kabotu alimwi ciindi ciingi wakali kuyiisya mwanaakwe atalaa Jehova. Wakali mwaalumi ulaamanguzu alimwi musolozi ulikabotu. Nkinkaako, baIsrayeli bakamukumbila kuti abasololele kukulwanaa basinkondonyina.

Jefita wakakomba kuli Jehova kuti amugwasye kuzunda basinkondonyina. Jefita wakasyomeza kuti, ikuti wazunda munkondo, muntu wakali kuyootalika kumutambula kuzwa mun’anda yakwe ciindi naboola kunkondo wakali kuyoomupa kuli  Jehova. Ooyo muntu wakali kuyookkala alimwi kabelekela kutente lyaLeza kwabuumi bwakwe boonse. Ciindi, tente lyaLeza bwakali busena bantu mpubakali kukombela Leza. Masimpe, Jefita wakazunda kunkondo! Ulimwizi na muntu wakatalika kuzwa mun’anda ciindi Jefita nakaboola kunkondo?—

Wakali mwanaa Jefita! Wakali simuzyalwa alikke, alimwi lino Jefita wakeelede kumutola kutente lyaLeza. Eezi zyakamucisa loko. Pesi, yeeya kuti Jefita wakali wasyomezya Jehova. Mpawo, mwanaakwe musimbi wakati: ‘Ndeende, mwakasyomezya Jehova, nkinkaako mweelede kuzuzikizya nzimwakasyomezya.’

Alakwe mwanaa Jefita zyakamucisa loko. Kutente lyaLeza, taakali kuyookwatwa pe nikuba kubaa bana. Nikuba boobo, wakalaa ciyandisyo cakuzuzikizya cisyomezyo cawisi akuyanda kubotezya Jehova. Eezyo zyakalikuyandika loko kulinguwe kwiinda kukwatwa akubaa bana. Nkinkaako wakasiya muunzi wakulimbabo akulipeda kuya kutente lyaLeza kuyookkala nkuko kwabuumi bwakwe boonse.

Ubonaanga zyakacitwaa musimbi ooyu zyakabotezya wisi aJehova na?— Iiyi, zyakababotezya! Ikuti koswiilila alimwi komuyanda Jehova, anduwe ulakonzya kucita mbuli mwanaa Jefita. Anduwe uyoobotezya ndiswe aJehova.