MATAUPU 4
Ne Fai ne Tou Fafine Tena Tamana mo Ieova ke Fia‵fia
Se a te tautoga ne fai ne Iefata ki a Ieova?
Ne seki faigofie, kae ne fai eiloa ne te tama fafine a Iefata a te mea ne tauto ki ei tena tamana
E Mata, e lavea ne koe te tamaliki fafine i te ata tenei?— A ia ko te tamaliki fafine a te tagata e igoa ki a Iefata. E se taku mai ne te Tusi Tapu tena igoa, kae e iloa ne tatou me ne fai ne ia tena tamana mo Ieova ke fia‵fia. Ke na onoono aka tatou ki mea e uiga ki tou fafine mo tena tamana ko Iefata.
A Iefata se tagata ‵lei kae ne fakamāumāu ne ia a taimi e uke o akoako tena tama fafine e uiga ki a Ieova. Ne fai foki a ia mo fai se tagata malosi mo se takitaki ‵lei. Tela la, ne fakamolemole atu te kau Isalaelu ke takitaki ne ia latou i te taua atu ki olotou fili.
Ne ‵talo atu a Iefata mō te fesoasoani o te Atua ke manumalo latou. Ne tauto atu tou tagata me kafai e manumalo a ia, ka tuku atu ne ia ki a Ieova a te tino muamua telā e vau ki tua mo tena fale i te taimi e toe fokimai ei a ia ki tena kāiga. A te tino tenei ka nofo kae galue i te faleie tapu o te Atua i tena olaga kātoa. A te faleie tapu ko te koga e olo ki ei a tino ke tapuaki atu ki te Atua i aso konā. Ia, ne manumalo a Iefata i te taua! E iloa ne koe me ko oi ne vau muamua ki tua mo te fale i te taimi ne foki atu ei a ia ki te fale?—
Ao, ko te tama fafine a Iefata! A tou fafine ko te tamaliki eiloa e tokotasi, kae nei la, ka uga atu ne Iefata tou fafine ke fano. Ne fai ne te mea tenei ke fanoanoa malosi tou tagata. Kae masaua me ko oti ne fai ne ia se tautoga. I konā foki eiloa, ne fai atu ei tena tama fafine, ‘Toku Tamana, ko oti ne fai ne koe se tautoga ki a Ieova, tela la, ke fakataunu eiloa ne koe.’
I tausaga katoa, ne olo atu a taugasoa o te tama fafine a Iefata o asi atu ki a ia
Ne fanoanoa foki te tama fafine a Iefata. I te faleie tapu, ne seki mafai o avaga tou fafine kae fai ana tama‵liki. Kae ne manako malosi tou fafine ke fakataunu te tautoga a tena tamana kae ne fai ei a Ieova ke fiafia. E tāua atu te mea tenā ki tou fafine i lō te avaga io me ko te faiga o tama‵liki. Tela la, ne tiakina ne tou fafine tena kāiga kae fanatu o nofo i te faleie tapu i tena olaga kātoa.
Se a tau faka‵tau me ne fia‵fia tena tamana mo Ieova ki te mea ne fai ne tou fafine?— Ao, ne penā eiloa! Kafai e fakalogo kae alofa koe ki a Ieova, e mafai eiloa o fai koe e pelā mo te tama fafine a Iefata. Ka fai foki ne koe ou mātua mo Ieova ke fia‵fia malosi.
