Nakikita mo ba an bata nga babaye ha retrato?— Anak hiya ni Jepte. Waray hiya ngarani ha Biblia, pero maaram kita nga iya ginpalipay an iya tatay ngan hi Jehova. Pag-istoryahan naton hiya ngan an iya tatay nga hi Jepte.

Maopay nga tawo hi Jepte ngan pirme niya gintututdoan an iya anak mahitungod kan Jehova. Makusog liwat hiya nga tawo ngan maopay nga lider. Salit ginpili hiya han mga Israelita nga manguna ha pakig-away kontra ha ira mga kaaway.

Nag-ampo hi Jepte ha Dios nga buligan hiya nga magdaog. Nagsaad hiya nga kon magdaog hiya, ihahatag niya kan Jehova an una nga tawo nga magawas ha iya balay. Ito nga tawo mag-aalagad ha tabernakulo han Dios ha iya bug-os nga kinabuhi  ngan maukoy hirani dida hito. An tabernakulo usa nga lugar nga ginkakadtoan hadto han mga tawo basi magsingba ha Dios. Syempre, nagdaog hi Jepte ha pakig-away! Pag-uli niya, maaram ka ba kon hin-o an una nga gumawas ha ira balay ha pagtapo ha iya?—

An anak ni Jepte! Usa la hiya nga anak, ngan yana mapapahirayo na hiya. Nasubo gud hito hi Jepte. Pero hinumdumi nga nagsaad na hiya. Dida hito nagsiring an iya anak, ‘Tatay, nagsaad ka kan Jehova, salit kinahanglan tumanon mo ito.’

Nasubo liwat an anak ni Jepte. Ha tabernakulo, diri hiya puydi mag-asawa ngan magkaanak. Pero karuyag gud niya nga tumanon an saad han iya tatay ngan lipayon hi Jehova. Mas importante ito ha iya kay ha pag-asawa o pagkaada mga anak. Salit binaya hiya ha ira balay ngan nag-alagad ha tabernakulo ha iya bug-os nga kinabuhi.

Para ha imo, napalipay ba niya an iya tatay ngan hi Jehova ha iya ginhimo?— Oo, napalipay gud! Kon masinugtanon ka ngan hinigugma mo hi Jehova, puydi ka magin pariho han anak ni Jepte. Mapapalipay mo liwat an imo mga kag-anak ngan hi Jehova.