Hitanao tsaiky amy sary io?... Jefta an̈aran̈a papany. Baiboly tsy mivolan̈a an̈aran̈a tsaiky io, fa raha haintsika fo izy namparavoravo Jehovah ndreky papany. Atsika hizaha tantarandro ndreky papany.

Jefta io olo tsara fan̈ahy ndreky nazoto nampianatra zanany raha momba Jehovah. Izy lelahy fatatra ndreky ten̈a nahay nitondra olonany. Iro Israelita aby io nan̈iraka izy hitariky iro hiady fahavalondro.

Jefta nivavaka tamy Jehovah, baka izy mandresy. Izy nivolan̈a tamy Jehovah fa izy koa mandresy, hamiany Jehovah zay olo miboaka voanalohany baka amy tran̈onany. Olo io halefany miasa amy tabernakeliny  Zan̈ahary an̈y, fa an̈y fo fa tsy mody eky. Taloha tan̈y, tabernakely zen̈y tran̈olay fivavahanolo tamy Jehovah. Nandresy ankitin̈y Jefta! Izy koa fa navy tantran̈onany, hainao azovy olo niboaka voanalohany?...

Zanany man̈angy! Nalahelo mare Jefta nahita izy, fotony io zaraiky fo zanany. Izy tsy maintsy mandefa zanany io, fotony izy efa nivolan̈a. Zanaka Jefta nivolan̈a tamy papany: ‘A Papa, ataova fo raha nivolan̈inao tamy Jehovah e.’

Zanaka Jefta koa mba nalahelo. Izy koa fa amy tabernakeliny Jehovah an̈y, izy tsy mety manambady ndreky miteraka zen̈y. Ten̈a tiany hamparavoravo Jehovah ndreky papany. Zen̈y nahavy izy nan̈eky niala tany misy izy, baka io nipetraka tamy tabernakely fo.

Namparavoravo Jehovah ndreky papany ma raha nataony in̈y?... Marin̈y zen̈y! Ke izikoa anao tia Jehovah ndreky man̈araka volan̈anany, karaha nataony zanaka Jefta in̈y, ho ravoravo Jehovah ndreky mamanao ndreky papanao.