¿Ka wilik wa le chan x-chʼúupal teʼ dibujooʼ?... Letiʼeʼ u hija juntúul máak tu kʼaabaʼtaj Jefté. Le Bibliaoʼ maʼatech u yaʼalik bix u kʼaabaʼ, baʼaleʼ k-ojel tu beetaj u kiʼimaktal u yóol u taata bey xan Jéeoba. Koʼox kaanbal tiʼ letiʼ bey xan tiʼ u taata.

Jefteeʼ juntúul máak jach uts tu jóoʼsaj tiempo utiaʼal u kaʼansik u chan hija yoʼolal Jéeoba. Letiʼeʼ juntúul máak jach yaan u muukʼ yéetel maʼalob u nuʼuktaj. Yoʼolal lelaʼ le israelitaʼoboʼ tu kʼáatoʼobtiʼ ka u nuʼuktoʼob ken baʼatelnakoʼob tu contra le máaxoʼob pʼekmiloʼoboʼ.

Jefteeʼ tu kʼáataj u yáantaj Dios utiaʼal ka ganarnakoʼob. Letiʼeʼ tu yaʼaleʼ wa ku ganareʼ, yaan u kʼubik tiʼ Jéeoba le yáax máax kun jóokʼol kʼamik tu yotoch ken suunak teʼ baʼateloʼ. Le máax ken u kʼuboʼ  yaan u bin meyaj tuláakal u kuxtal tu tabernáculo Dios. Le tabernaculooʼ junpʼéel kúuchil tuʼux ku bin le israelitaʼob u adorartoʼob Dios teʼ kʼiinoʼob jeʼeloʼ. Jefté túuneʼ, ¡tu ganartaj le baʼateloʼ! Ka suunaj tu yotocheʼ, ¿a wojel wa máax le yáax jóokʼ kʼamkoʼ?...

¡U hija! Jefteeʼ minaʼan uláakʼ u paalal yéetel beoraaʼ kʼaʼabéet u túuxtik u hija kajtal náach. Leloʼ tu beetaj u jach yaatal u yóol. Baʼaleʼ kʼaʼajaktech le baʼax tu yaʼalaj tiʼ Jéeobaoʼ. Le oʼolal u hijaeʼ tu yaʼalajtiʼ: «Papi le baʼax a waʼalmaj tiʼ Jéeobaoʼ kʼaʼabéet a wilik a tsʼoʼokbesik».

U hija Jefteeʼ yaachaj xan u yóol. Ken kajlak teʼ tabernaculooʼ maʼ kun páajtal u tsʼoʼokol u beel mix u yantal u paalal. Kex beyoʼ, letiʼeʼ jach u kʼáat u béeykunt le baʼax tu yaʼalaj u taataoʼ yéetel u kʼáat xan u kiʼimakkúunt u yóol Jéeoba. Lelaʼ maas kʼaʼanaʼan u yilik tiʼ u tsʼoʼokol u beel wa u yantal u paalal. Le oʼolaleʼ tu pʼataj u yotocheʼ ka bin kajtal teʼ tabernáculo tuláakal u kuxtaloʼ.

Le baʼax tu beetaʼ, ¿tu kiʼimakkúuntaj wa u yóol u taata bey xan Jéeoba?... ¡Jaaj, tu kiʼimakkúuntaj u yóoloʼob! Wa ka wuʼuyik tʼaan yéetel ka yaabiltik Jéeoba jeʼex úuchik u beetik u hija Jefteeʼ, yaan xan a kiʼimakkúuntik u yóol a taataʼob bey xan Jéeoba.