Akion pa si Samuel kan mag-istar siya asin maglingkod sa tabernakulo, an pigdudumanan kan mga tawo para magsamba ki Jehova. Natâ yaon sa tabernakulo si Samuel? Aramon ta nguna an istorya kan saiyang ina na si Hana.

Sa haloy na panahon, dai nagkakaaki si Hana dawa gustuhon niyang magkaaki. Kaya grabe su pagpamibi niya ki Jehova na tabangan siya. Nangako siya na kun magkakaaki siya nin lalaki, dadarahon niya ini sa tabernakulo para duman mag-istar asin maglingkod. Sinimbag ni Jehova an pamibi niya. Nagkaaki siya nin lalaki, na pinangaranan niyang Samuel. Kan si Samuel tulo o apat na taon na, ginibo ni Hana an ipinangako niya. Dinara niya si Samuel sa tabernakulo para maglingkod sa Diyos.

Si Eli an halangkaw na saserdote sa tabernakulo. Naglilingkod man duman an duwa niyang aking lalaki. Tandaan na an tabernakulo iyo an harong nin Diyos na pigdudumanan kan mga tawo para magsamba, kaya dapat marahay an ginigibo duman kan mga tawo. Pero marauton an mga ginigibo kan mga aki ni Eli. Nahihiling iyan ni Samuel. Naggibo daw si Samuel nin maraot arog kan mga aki ni Eli?— Dai. Padagos niyang ginibo kun ano an tama, arog kan pigtukdo kan saiyang mga magurang.

Ano sa hiling mo an dapat na ginibo ni Eli sa duwa niyang aki?— Dapat kutana pigpadusahan niya sinda saka dai na tinugutan na maglingkod sa harong nin Diyos. Pero dai iyan ginibo ni Eli, kaya naanggot saiya si Jehova saka sa duwa niyang aki. Nagdesisyon si Jehova na padusahan sinda.

Sarong banggi mantang turog si Samuel, may nadangog siyang nag-apod saiya: ‘Samuel!’ Nagdalagan siya ki Eli, pero an sabi ni Eli: ‘Dai taka man inapod.’ Duwang beses pa ining nangyari. Kan ikatulong beses na, sinabi ni Eli ki Samuel na kun madangog niya giraray an boses, sabihon niya: ‘Magtaram tabi kamo Diyos na Jehova, nagdadangog po ako.’ Kaya iyan  an ginibo ni Samuel. Tapos, sinabi ni Jehova ki Samuel: ‘Sabihon mo ki Eli na papadusahan ko an pamilya niya huli sa maraot na mga ginigibo ninda.’ Sa paghuna mo, madali daw ki Samuel na sabihon ini ki Eli?— Bako. Pero maski natatakot si Samuel, ginibo niya an ipinapagibo ni Jehova. Nagkatotoo an sinabi ni Jehova. Nagadan an duwang aki ni Eli, pati si Eli.

Magayon na halimbawa sa sato si Samuel. Ginibo niya kun ano an tama dawa nahihiling niya na maraot an ginigibo kan iba. Ika, aarugon mo daw si Samuel asin gigibuhon mo man pirmi kun ano an tama? Pag ginibo mo iyan, mapapaugma mo si Jehova saka an mga magurang mo.