Kutendekatu kimye Samwela kyo akijinga mwanyike, waikalanga mu tente wa lusambakeno ne kwingijila monka. Tente wa lusambakeno ke mpunzha bantu yo baiyangamo na kupopwela Yehoba. Nanchi wayuka byo kyajinga pa kuba’mba Samwela eye na kwikala mu tente wa lusambakeno nyi? Twaya patanshi tufunde pe inanji Samwela aye Hana.

Samwela saka akyangye kusemwa, inanji aye Hana wakebeshe bingi kwikala na mwana, pano bino, kechi wajinga na mwana ne. Onkao mambo, walombele kwi Yehoba kuba’mba amukwashe. Walayile kuba’mba inge akekale na mwana wamulume, ukamutuma kuya na kwikala ne kwingijila mu tente wa lusambakeno. Yehoba wakumbwile lulombelo lwanji, kabiji Hana wasemene mwana wamulume. Kabiji wamutumbile jizhina amba Samwela. Byonkatu byalayile Hana, kimye Samwela kyo ajinga na myaka isatu nangwa 4, wamutwajile ku tente wa lusambakeno na kwingijila Lesa.

Eli wajinga ñanga wa Lesa waingijilanga mu tente wa lusambakeno. Eli wajinga ne na baana ba balume babiji baingijilanga monka mu tente wa lusambakeno. Tente wa lusambakeno yo yajinga nzubo ya Lesa ya kumupopwelamo, kabiji bantu baingijilangamo bafwainwe kubanga bintu byawama. Pano bino, baana ba kwa Eli baubilenga bintu byatama. Kabiji Samwela wamwenenga bintu byo baubilenga. Abya Samwela naye waubanga bintu byatama byonka byaubanga baana ba kwa Eli nyi?— Ine, aye watwajijile kuba byawama kwesakana na bya mufunjishe bansemi banji.

Pano nga Eli wafwainwe kwiboba byepi bano baana banji ba balume babiji?— Wafwainwe kwibakajipila. Kechi wafwainwe kwibaswisha kutwajijila kwingijila mu nzubo ya Lesa ne. Pano bino, Eli kechi byo byo aubile ne, onkao mambo, Yehoba wamuzhingijile aye ne baana banji ba balume babiji. Kabiji Yehoba wafuukwilepo kwibakambula.

Juba jimo bufuku Samwela saka alaala, waumvwine jiwi na kumwita’mba: ‘Samwela!’ Ponkapo wabuukile ne kuya lubilo kwi Eli, bino Eli wamwambijile’mba: ‘Ine, kechi nakwita  ne.’ Kabiji waumvwine jiwi na kumwita ne jikwabo bimye bibiji. Byo aumvwine jiwi kimye kya busatu, Eli wamubuujile Samwela amba inge omvwe jiwi na kumwita ne jikwabo, akumbule’mba: ‘Bambenga mwane, anweba Yehoba; mbena kuteleka.’ Samwela naye waubile byonka byo bamubujile. Kepo Yehoba amwambijile Samwela amba: ‘Ubuule Eli kuba’mba nkamukambula aye ne baana banji na mambo a bintu byatama byo bauba.’ Abya walanguluka’mba kyamupelejile Samwela kubuula Eli bino byambo nyi?— Ine, kechi kyapelele ne. Nangwa kya kuba Samwela wachiine, bino waubile byamwambijile Yehoba kuba. Bintu byaambile Yehoba byamwekele. Bano baana ba balume babiji ba kwa Eli bafwile, kabiji ne Eli naye wafwile.

Twakonsha kufunjilako bintu byawama kwi Samwela. Samwela waubilenga byawama nangwa kya kuba wamwenenga bakwabo na kuba byatama. Nga obewa wafwainwa kuba byepi? Nanchi wakonsha kwikala byonka byajinga Samwela ne kutwajijila kuba byawama nyi? Inge wauba bino, ukasangajika muchima wa Yehoba ne bansemi bobe.