IMBATA 5
Samueli Mu Ndra Drile E’yo Kililiruri ’Yezu
E’dozu Samueli ni nga ovuzu werea ru ria, o’a azini nga ndra azi jo ’ba yini ndra emuzu Yehova ni inzizu omvele hema ti ecita niri ma alea. Mi ni Samueli eca ndra jo Yehovani ria ngoni ngoni’ari ra ya? Okorisi ama ma oniki nga e’yo Samueli andri Hana ma dria raka.
Ndra e’dozu drio Hana le mva isu, te isuni ku. Nga di Yehova ni zi azini ri matu ’ba eri vu i ma aza kozu. So oyo kini i ka nga agupiamva isu, i nga eri fe mu o’azu azini azi ngazu jo Yehova ni ria. Yehova nga eri ma izita omvi, coti osi agupiamva ra. ’Da runi Samueli i. Trotro ndra Hana ni oyo ni sole rile, Samueli ma eli ni cazu na kaniku su ’boria, nga eri ji jo Yehova ni ria azi ngazu Mungu ni ’dale.
Sawa ’da ma alea agu kuhani amboru jo Yehova nia ri ndra Eli i. Eri vule agupianzi iri ’diyi vini ndra azi nga ’daa indi. Mi eco ega ra kini, jo Yehova niria ’ba Mungu ni inzi, ani le ece kokoru ’ba ma ’ye e’yo muke ’diyi alenia a’dule. Te agupianzi Eli ni ’diyi ndra e’yo onzi yi ’ye. Samueli ne e’yo onzi eyini ’ye ’diyi ra. Te Samueli ’ye ndra e’yo onzi Eli ma anzipi ni ’ye ’diyi indi ya?— Yo, mu ndra drile e’yo kililiru ri ’yezu i, ekile eri ma tipika ni imba erini rile.
Mini ega risi le ndra Eli ma ’ye agupianzi erini ’diyi a’duru?— Le ndra ma fe eyini panga ece kokoru dika ma fe eyini azi ngazu jo Munguni ria ku. Te Eli awini ’ye ’dini ku, ani fe a’oko nya Yehova ma ale erini eri ma agupianzi iri ’diyi be. Yehova nga di panga fe eyini ra.
Samueli lu e’yo Yehovani ’yori Eli ni
O’du azini alu Samueli ni o’du kozu inisi ria, Samueli nga eri ’ba azi omve i: ‘Samueli!’ Nga nzu Eli vu, te Eli omvi kini: ‘Ma omveni mi ku.’ E’yo ’di ’ye i ’dile pale na. Pale na zu ria, Eli ’yo Samueli ni kini ka o’duko ’diri eri dika, ma ’yo: ‘Mi nze e’yo, Yehova, Ma mi eri ria.’ Samueli nga ’ye ’dinile. Coti Yehova nga di ’yo Samueli ma tia: ‘Mi lu Eli ni Ma nga panga fe ’ba eri vule akua ’diyi ni e’yo onzi eyini ’yele ’diyisi.’ Mini ega risi e’yo ’diri luzu Eli ni ri ma ewa ndra Samueli ni yo ya?— Yo, ovuni ndra ewa kokoru ku. Samueli ni tro ndra ovuzu urusi ra ti, ’ye ndra e’yo Yehova ni lu ma ’ye ri ra. E’yo ndra Yehova ni ’yo ri nga eca tro tro. Eli pi eri ma agupianzi iri ’diyi pie ngaki odra ra.
Samueli e’da amani eceta kililru ri. Eri ndra e’yo muke ri ’ye i tro ’ba azi ’diyi ni ndra e’yo onzi ’diyi ’yezu ra ti. Te mi i ria? Mi nga ovu Samueli le muzu drile e’yo kililiru ri ’yezu i ra ya? Mi ka ’ye ’dini, mi nga ayiko fe Yehova ni azini mi tipika yini.
