ບົດຮຽນ 5
ຊາເມືອນເຮັດສິ່ງທີ່ຖືກຕ້ອງຕໍ່ໆໄປ
ຕັ້ງແຕ່ເປັນເດັກນ້ອຍ ຊາເມືອນໄດ້ມາຢູ່ແລະເຮັດວຽກທີ່ທັບອາໄສ ເຊິ່ງເປັນບ່ອນທີ່ຜູ້ຄົນມານະມັດສະການພະເຢໂຫວາ. ລູກຮູ້ບໍ ຊາເມືອນມາຢູ່ທີ່ທັບອາໄສໄດ້ແນວໃດ? ທຳອິດໃຫ້ເຮົາມາຮຽນເລື່ອງນາງອານາ ແມ່ຂອງຊາເມືອນນຳກັນກ່ອນ.
ຕັ້ງແຕ່ດົນແລ້ວ ນາງອານາຢາກໄດ້ລູກຫຼາຍແທ້ໆ ແຕ່ລາວກໍບໍ່ໄດ້ລູກຈັກຄົນເລີຍ. ດັ່ງນັ້ນ ລາວຈຶ່ງອະທິດຖານແລະອ້ອນວອນຂໍໃຫ້ພະເຢໂຫວາຊ່ວຍລາວໃຫ້ໄດ້ລູກຄົນໜຶ່ງກໍດີຫຼາຍແລ້ວ. ລາວສັນຍາກັບພະເຢໂຫວາວ່າຖ້າລາວໄດ້ລູກຊາຍ ລາວຈະສົ່ງຜູ້ນັ້ນໃຫ້ໄປຢູ່ແລະຮັບໃຊ້ທີ່ທັບອາໄສ. ພະເຢໂຫວາໄດ້ຕອບຄຳອະທິດຖານຂອງລາວໂດຍໃຫ້ລາວໄດ້ລູກຊາຍ. ລາວຕັ້ງຊື່ໃຫ້ລູກວ່າຊາເມືອນ. ເມື່ອຊາເມືອນອາຍຸໄດ້ສາມຫຼືສີ່ປີ ອານາກໍໄດ້ໃຫ້ລູກຊາຍໄປຮັບໃຊ້ພະເຢໂຫວາທີ່ທັບອາໄສຕາມທີ່ລາວໄດ້ສັນຍາໄວ້.
ທ້າວເອລີເປັນປະໂລຫິດໃຫຍ່ເຮັດວຽກຢູ່ທີ່ທັບອາໄສ. ລູກຊາຍຂອງລາວສອງຄົນກໍເຮັດວຽກຢູ່ຫັ້ນນຳກັນ. ຢ່າລືມວ່າທີ່ທັບອາໄສເປັນບ່ອນເພື່ອນະມັດສະການພະເຢໂຫວາ ຜູ້ຄົນຄວນຈະເຮັດແຕ່ສິ່ງທີ່ດີງາມໃນທີ່ນັ້ນ. ແຕ່ລູກຊາຍຂອງເອລີໄດ້ເຮັດແນວທີ່ຊົ່ວຫຼາຍ. ຊາເມືອນເຫັນສິ່ງທີ່ພວກເຂົາໄດ້ເຮັດ. ຊາເມືອນໄດ້ເຮັດສິ່ງທີ່ຊົ່ວຄືພວກລູກຊາຍຂອງເອລີບໍ?— ບໍ່ ລາວຍັງເຮັດສິ່ງທີ່ຖືກຕ້ອງຕໍ່ໆໄປ ຄືກັບທີ່ພໍ່ແມ່ຂອງລາວໄດ້ສອນໄວ້.
ລູກຄິດວ່າເອລີຄວນເຮັດແນວໃດກັບລູກຊາຍທັງສອງຄົນ?— ລາວຄວນຈະລົງໂທດພວກເຂົາ.ລາວບໍ່ຄວນໃຫ້ພວກເຂົາເຮັດວຽກຢູ່ທີ່ວິຫານຂອງພະເຈົ້າອີກຕໍ່ໄປ. ແຕ່ເອລີບໍ່ໄດ້ເຮັດ ດັ່ງນັ້ນ ພະເຢໂຫວາຈຶ່ງໃຈຮ້າຍໃຫ້ລາວແລະລູກຊາຍຂອງລາວຫຼາຍ. ພະເຢໂຫວາຈຶ່ງຕັດສິນລົງໂທດພວກເຂົາເຖິງຕາຍ.
ໃນຄືນໜຶ່ງໃນຂະນະທີ່ຊາເມືອນກຳລັງນອນຫຼັບຢູ່ ລາວໄດ້ຍິນສຽງເອີ້ນວ່າ ‘ຊາເມືອນເອີຍ!’ ລາວຈຶ່ງແລ່ນໄປຫາເອລີ ແຕ່ເອລີຕອບວ່າ ‘ຂ້ອຍບໍ່ໄດ້ເອີ້ນເຈົ້າ’ ແລ້ວກໍມີສຽງເອີ້ນແບບນີ້ອີກສອງເທື່ອ. ຫຼັງຈາກເອີ້ນເທື່ອທີສາມ ເອລີໄດ້ບອກຊາເມືອນວ່າ ຖ້າໄດ້
ຍິນສຽງອີກ ໃຫ້ເຈົ້າເວົ້າວ່າ ‘ເຊີນເວົ້າເລີຍ ພະເຢໂຫວາ ຂ້ານ້ອຍກຳລັງຟັງຢູ່’ ແລະຊາເມືອນກໍເຮັດຕາມນັ້ນ ແລ້ວພະເຢໂຫວາໄດ້ບອກຊາເມືອນວ່າ: ‘ໃຫ້ບອກເອລີວ່າ ເຮົາຈະລົງໂທດຄອບຄົວຂອງລາວສຳລັບສິ່ງຊົ່ວທີ່ພວກເຂົາໄດ້ເຮັດ.’ ລູກຄິດວ່າງ່າຍບໍທີ່ຊາເມືອນຈະບອກຂ່າວນີ້ໃຫ້ເອລີຮູ້?— ບໍ່ງ່າຍເລີຍ. ເຖິງວ່າຊາເມືອນຈະຮູ້ສຶກຢ້ານ ແຕ່ລາວກໍຍັງເຮັດຕາມຄຳສັ່ງຂອງພະເຢໂຫວາ ແລ້ວສິ່ງທີ່ພະອົງໄດ້ບອກໄວ້ນັ້ນກໍເກີດຂຶ້ນແທ້. ລູກຊາຍທັງສອງຄົນຂອງເອລີຖືກຂ້າ ແລະເອລີກໍໄດ້ຕາຍຄືກັນ.ຊາເມືອນເປັນຕົວຢ່າງທີ່ດີໃຫ້ພວກເຮົາ. ລາວເຮັດສິ່ງທີ່ຖືກຕ້ອງສະເໝີ ເຖິງວ່າຈະເຫັນຄົນອື່ນເຮັດສິ່ງທີ່ບໍ່ດີກໍຕາມ. ແລ້ວລູກເດ? ລູກຈະເປັນຄືກັບຊາເມືອນແລະເຮັດສິ່ງທີ່ຖືກຕ້ອງຕໍ່ໆໄປບໍ? ຖ້າເຮັດໄດ້ ລູກກໍຈະເຮັດໃຫ້ທັງພະເຢໂຫວາແລະພໍ່ແມ່ດີໃຈ.