SOMO MAR 5
Samuel ne Odhi Nyime Timo Gik Makare
Chakre tinne, Samuel nodak kendo ne tiyo e tabanakel, ma ne en kama ji lamoe Jehova. Be ing’eyo gimomiyo Samuel ne odhi dak e tabanakel? We wakwong wapuonjre ane e wi Hanna, min Samuel.
Hanna nosebedo ka gombo nyathi aming’a. Kata kamano, ne ok onyal nyuol. Omiyo, ne osayo Jehova e lamo mondo okonye. Ne osingore ni ka onyuolo wuowi, to ne odhi chiwe mondo oti ne Jehova e tabanakel. Jehova nodwoko lamoneno monyuolo nyathi ma wuowi. Ne oluongo nyathino ni Samuel. Hanna notimo mana kaka ne osingore. Kane nyathino en gimoro higni adek kata ang’wen kama, notere e tabanakel mondo oti ne Nyasaye kuno.
Gie kindego, Eli ema ne jadolo maduong’ e tabanakel. Yawuote ariyo be ne tiyo kuno. Ng’e ni tabanakel ne en kama ilamoe Nyasaye, kendo ji ne onego otim mana gik makare kuno. Kata kamano, yawuot Eli ne timo gik maricho ahinya. Samuel ne neno gik maricho ma ne gitimogo. Be Samuel nochako timo gik maricho kaka yawuot Eli?— Ooyo, ne odhi nyime timo gik makare mana kaka jonyuolne ne opuonje.
Iparo ni Eli ne onego okaw okang’ mane ne yawuote ariyogo?— Ne owinjore okumgi. Ne ok onego oyienegi dhi nyime tiyo e od Nyasaye. Eli to ne ok otimo kamano, omiyo i Jehova ne owang’ kode kaachiel gi yawuote. Jehova nong’ado mar kumogi giduto.
Samuel nonyiso Eli gima Jehova ne owacho
Chieng’ moro gotieno kane Samuel nindo, nowinjo ka ng’ato luonge niya: ‘Samuel!’ Samuel noringo odhi ir Eli, to Eli nonyise niya: ‘Ok aluongi.’ Mano notimore diriyo kendo. To mar adek, Eli nonyiso Samuel ni kowinjo dwolno kendo to odwok niya: ‘Wuo Jehova, awinji.’ Omiyo, kamano e kaka Samuel notimo. Kae to Jehova nonyiso Samuel niya: ‘Nyis Eli ni abiro kumo joode nikech gik maricho ma gisetimo.’ Be iparo ni nyiso Eli wachno ne en gima yot ne Samuel?— Ooyo, timo kamano ne tek. Kata obedo ni Samuel ne luor, notimo gima Jehova nonyise. Gima Jehova nowacho ni ne dhi timore ne od Eli, notimore adier. Yawuot Eli ariyogo ne onegi, kendo Eli owuon be ne otho.
Samuel noketo ranyisi maber monego waluw. Notimo gik makare kata obedo ni ne oneno ka jomoko timo gik maricho. To nade in? Be ibiro bedo kaka Samuel kendo dhi nyime timo gik makare? Ka itimo kamano, ibiro moro Jehova kendo ibiro moro jonyuolni.
