Samuele fume ku vunike vueni ua pangele ku tavenakulu, cihela ci va kele na ku ya vantu mu ku ka lemesa Yehova. Ua tantekeya vati Samuele ua ile ku tavenakulu ni? Tu ci lilongese via vanaye Hana.

Hana ua tondele ku kala na muana, vunoni mua hitile miaka ya ingi. Ngeci ua vundilile kuli Yehova linga a mu kuase. Ua kulahesele Yehova ngueni nga a sema muana a ka mu tuma ku tavenakulu a ka kaleko. Yehova ua kumbuluile civundilo ceni, kaha ua semene muana ua yala. Ua mu lukile ngueni Samuele. Kaha Hana ngue muze mua kulahesele, omo Samuele ua puisile miaka itatu ni iuana, ua mu tualele ku tavenakulu linga a ka pangele Njambi.

Eli ua puile sasendote ua kama ku tavenakulu. Kaha ua kele na ku pangela hamo na vana veni ku kuze. Vuluka ngecize, tavenakulu ya puile ndzivo ya Njambi ku va kele na ku mu lemesela, kaha ka kua pandele ku kala vantu vakua vilinga via ku pihia. Vunoni vana va Eli va kele na ku linga via ku pihia. Samuele ua muene vi va kele na ku panga. Vuno Samuele neni ua lingile vipi ngeci mua vana va Eli ni?— Houe ikeye ua tualeleleho ku linga via cili ngue muze mu va mu longesele visemi veni.

Mu ku singanieka cove, vati Eli ua pandele ku panga vana veni vavali?— Tele nga ua va hele kasitiku. Nga ka va tavesele va tualeleleho ku pangela ku ndzivo ya Njambi. Vunoni Eli ka lingilemo, ngeci Yehova ua tenukile cikuma na Eli na vana veni vavali. Ngeci mukemuo Yehova ua va hele kasitiku.

Tangua limo Samuele tele na kosa, ua vuile lizi lia mu sanene ngualio: ‘Samuele!’ Ngeci ua tuntilile kuli Eli, vunoni Eli ngueni: ‘Kanja ku sanene.’ Evi via lingikile luvali. Lua mu citatu, Eli ua lekele Samuele ngueni nga a kevua lizi liaco naua, na pande ku ka kumbulula ngueni: ‘Handeka Yehova, nja halakana.’ Kaha Samuele ua lingilemo. Ngeci Yehova ua lekele Samuele ngueni: ‘U ka leka Eli ngecize nji ka hana kasitiku kuli ikeye na vana veni omo lia viuma via ku pihia vi va na lingi.’ Mu ku mona cove, ca puile ca casi kuli Samuele ku leka ou muzimbu kuli Eli ni?— Houe ka ca puile ca casi. Vutuhu Samuele ua vuile vuoma ua pangele via mu tumine Yehova. Via handekele Yehova via lipuisilemo. Vana va Eli vavali va tsile, kaha na Eli neni ua tsile.

Samuele ua tu sila lungano lua cili. Ua lingile via cili vutuhu vakuavo vakele na ku linga via ku pihia. Amba yoveco? Nove u pua ngue Samuele na ku tualelelaho ku linga via cili, ni? Nga u lingamo, u ka vuisa Yehova na Visemi viove ndzolela ya kama ku mutima.