O Samuel ciknorestar dživelas a kerelas buťi paš le Devleskero stanos. Ode o manuša phirenas, kaj te služinen le Jehovaske. Sar oda, hoj ciknorestar služinelas o Samuel paš le Devleskero stanos? Peršo peske phenaha vareso pal leskeri daj Anna.

But berša la Anna našťi sas čhave. Oj len andal calo jilo kamelas. Vašoda pes mangelas ko Jehovas, kaj latar te ačhel daj. Oj les diňa o sľubos. Te pes lake naroďinela muršoro, bičhavela les andro Devleskero stanos, kaj ode te služinel calo dživipen. O Jehovas la šunďa avri. O muršoro pes naroďinďa a oj leske diňa menos Samuel. Sar sas le Samueloske 3 abo 4 berš, avka sar e Anna sľubinďa the kerďa, ľigenďa les paš o Devleskero stanos, kaj ode te služinel.

O Elis sas baro kňazos, so služinelas andro Devleskero stanos. Sas les duj čhave a the on ode kerenas buťi. Devleskero stanos sas than, kaj o manuša služinenas le Jehovaske. Ola, so ode kerenas buťi, mušinenas te en lačhe. Ale le Eliskere čhave kerenas igen nalačhe veci a o Samuel ada dikhelas. Sas the o Samuel ajso sar Eliskere čhave? — Na, ov sas lačho a dživelas pal oda, so les sikaďa leskeri daj leskero dad.

So phenes, so majinďa te kerel o Elis peskere duje čhavenca? — Na majinďa pre lende ča te dikhel, ale te čhivel len avri odarig, kaj imar te na služinen paš o Devleskero kher. O Elis ada na kerďa a vašoda o Jehovas sas choľamen pre leste the pre leskere duj čhave a anďa pre lende bibacht čiže ňešťesca.

Jekhvar raťi, sar o Samuel sovelas, uštaďa les hlasos, so vičinelas: „Samuel!“ Ov sig geľa paš o Elis, ale o Elis leske phenďa: „Me tut na vičinavas.“ Ada pes ačhiľa mek duvar. Paľis phenďa o Elis le Samueloske, kaj te phenel akor, sar šunela ada hlasos mek jekhvar: „Jehova vaker, me tut šunav“. A o Samuel ada avka  kerďa. Paľis o Jehovas phenďa le Samueloske: „Phen le Eliske, hoj anava pre leskeri fameľija bibacht, bo keren igen nalačhe veci.“ So phenes, sas lokes prekal o Samuel te phenel le Eliske adi sprava? — Ada na sas lokes. The te o Samuel daralas, the avka kerďa oda, so leske phenďa o Jehovas. Oda, so o Jehovas phenďa, pes ačhiľa. Le Eliskere čhaven murdarde a o Elis muľa thiš.

O Samuel hino lačho priklados prekal amende. Ov kerelas oda, so sas mište, the te dikhelas, hoj aver manuša keren nalačhe veci. A so tu? Kereha the tu oda, so hin mište avka sar o Samuel? Te ajso aveha, kereha radišagos le Jehovaske the la dake le dadeske.