Панда сар цикно, о Самуил бешелас тай керелас бути ко свето шатъри, о тхан кате о мануша поклониненас пес е Йеховаске. Жанес ли соске о Самуил бешелас отхе? За те отговоринас, нека най–наангле те ахальовас по–бут лескере даяке, е Аннаке.

Бут време и Анна мангелас те овел ла чшаве, ама нащине. Адалкхеске молисайли вогиестар е Йеховаске те помагинел лаке. Ой обещингяс, кай ако иси ла чшаво, ка дел лес те живинел тай те керел бути ко свето шатъри. О Йехова отговорингяс лакере молитвате. И Анна биянгяс чшавес тай тховгяс лескоро алав Самуил. Тай сарто обещингясас, кана ов уло 3–4 брешенгоро, ингалгяс лес те служинел е Девлеске ко свето шатъри.

Първосвещеники андо шатъри уло о Илий. Давкха уло о главно мануш ковато представинел е манушен англал о Дел. Лескере дуй чшаве–да керенас бути отхе сар свещеникя. Де тут годи, кай о свето шатъри уло о тхан кате о мануша поклониненас пес е Йеховаске, тай отхе требинелас те керен пес само лачше букя. Ама е Илийескере чшаве керенас бут кханиле букя. О Самуил дикхелас давкха. Керелас ли ов–да кханиле букя сар ленде? — На керелас. Точно сарто сикавдесас лес лескере родителя, о Самуил керелас со си правилно.

Со мислинес кай требинелас те керел о Илий пе чшавенца? — Требинелас те накажинел лен тай вече те на мукел лен те керен бути анде Девлескоро кхер. Ама ов на кергяс давкха. Адалкхеске о Йехова бут диняс пес холи е Илийеске тай лескере чшавенге тай решингяс те накажинел лен.

Йекх рат, бискай совелас, о Самуил шунгяс кай декхой викинел лес. Прастанило паш о Илий, ама ов пхенгяс леске: „На викингьом тут.“ Давкха ачшило панда дувар. Ко тринто дром о Илий пхенгяс е Самуилеске,  кай ако шунел пак о гласос, требинел те пхенел: „Пхен манге Йехова, соскето торо служители шунел!“ О Самуил кергяс точно давкха. Тогава о Йехова пхенгяс леске те пхенел е Илийеске, кай ка накажинел лескоро семейство ашал е кханиле букиенге колато керен. Мислинес ли кай уло лесно е Самуилеске те пхенел давкха е Илийеске? — Нисар на уло леске лесно. Въпреки кай даралас ов кергяс со пхенгяс леске о Йехова. Давкха со пхенгяс о Йехова ачшило — е Илийескере дуй чшаве уле мударде тай о Илий–да муло.

О Самуил си шукар примери аменге. Ов керелас со си правилно, въпреки кай дикхелас авере манушен те керен кханиле букя. А ту? Мангес ли ту–да сар о Самуил те керес со си правилно? Ако керес давкха, ка лошанкярес сарто е Йеховас, чука те родителен–да.