Depuis kete ti lo, Samuel alango na tabernacle na lo sara kua kâ. Na tabernacle lani, azo ayeke gue ti voro Jéhovah kâ. Me a sara tongana nyen la si Samuel alango kâ so? Zia e gi ti hinga ye kozoni kue na ndo ti Hanna, mama ti Samuel.

Hanna aye lani ti dü molenge, me lo peut lani ape. Tongaso, lo sambela Jéhovah ti mû maboko na lo. Lo tene na Jéhovah so tongana lo sara si lo dü molenge ti koli, lo yeke tokua lo na tabernacle ti sara kua na Jéhovah kâ. Jéhovah amä sambela ti lo, na Hanna adü molenge ti koli. Lo zia iri ti lo Samuel. Tongana Samuel awara ngu ota wala osio tongaso, mama ti lo asara tâ gi tongana ti so lo tene ândö na Jéhovah. Lo tokua Samuel na tabernacle ni.

Éli ayeke lani kota prêtre na tabernacle ni. Amolenge ti lo ti koli use kue asara kua kâ. Girisa ape so tabernacle ni ayeke lani ndo so azo ayeke voro Jéhovah dä. Tongaso, azo so ague kâ adoit ti sara gi ye so ayeke nzoni. Me amolenge ti Éli asara ti ala gi aye ti sioni, na Samuel abâ ni lani. Lo kue lo sara tongana ti ala?— Oko ape. Lo sara ti lo lani ye so ayeke nzoni, tâ gi tongana ti so babâ na mama ti lo afa na lo.

Mo pensé a yeke nzoni Éli asara nyen na amolenge ti lo ni?— Lo doit ti punir ala na ti tomba ala na yâ ti da ti Nzapa ni. Me a yeke ye so lo sara ape, tongaso bê ti Jéhovah ason na tere ti lo nga na tere ti amolenge ti lo ni. Lo ye ti punir ala.

Na mbeni bï, tongana Samuel ayeke lango, lo mä a iri lo: ‘Samuel!’ Lo londo, lo gue hio na mbage ti Éli, me Éli atene na lo: ‘Mbi iri mo ape.’ Samuel akiri alango. Lo kiri lo mä a iri lo lege use. Me tongana a iri lo ti lege ota ni, Éli atene na lo so tongana lo kiri lo mä go ni airi lo, a yeke nzoni lo tene: ‘Sara tënë, Jéhovah, mbi yeke mä mo.’ Tâ gi ye so Samuel asara la. Tongaso, Jéhovah atene na Samuel:  ‘Tene na Éli so mbi yeke punir sewa ti lo ndali ti asioni ye so ala sara so.’ Na mo, a yeke kete ye na Samuel ti fa tënë ti Jéhovah ni so na Éli?— A yeke kete ye lani ape. Samuel asara mbeto ti fa tënë ni na Éli, me lo kanga bê ti lo, lo fa ni. Ye so Jéhovah atene so asi tâ gi tongana ti so lo tene. A fâ amolenge ti Éli ni nga lo Éli ni wani lo kui.

A yeke nzoni e sara ye tongana Samuel. Lo sara ye so ayeke nzoni, atâa so ambeni zo ni asara ye so ayeke sioni. Ka mo, mo kue mo yeke sara ye so ayeke nzoni tongana ti Samuel? Tongana mo sara tongaso, mo yeke zia ngia na bê ti Jéhovah nga na bê ti babâ na mama ti mo.