Јуруктагы уулчакты ајарып кӧр. Уулчактыҥ јаҥыскан артып калганы ла ого коркымчылу болгоны кӧрӱнет. Сенде мындый сезимдер болгон бо?~ Мындый сезимдерди кезикте бистиҥ кажыбыс ла сезет. Мындый сезимдерди Иегованыҥ најылары база сескен деп, Агару Бичиктеҥ билип јадыс. Олордыҥ бирӱзи — Илья́ болгон. Бу кижи керегинде кӧптӧдӧ билип алак.

Илья Иисус Христос чыгардаҥ канча кире озо Изра́ильде јаткан. Израильдиҥ кааны — Аха́в, ол чындык Кудайга — Иеговага бажырбас болгон. Ахав ла оныҥ абакайы — Иезаве́ль, тӧгӱн кудайга, Ваалга бажырар болгондор. Оныҥ учун Израильдиҥ улузыныҥ кӧп сабазы Ваалга бажырып баштагылаган. Иезавель деп каан абакай коркышту калју болгон. Ол Иеговага бажырып тургандардыҥ ончозын, анайда ок Ильяны ӧлтӱрип саларга кӱӱнзеген. Илья нени эткен билериҥ бе?~

 Ол ыраак чӧлдӧӧн качып, куй ташта јажынган. Ол нениҥ учун мынайып этти, сен канайып сананып туруҥ?~ Нениҥ учун дезе, ол коркый берген. Је ого коркыбас керек болгон. Нениҥ учун? Ол, Иегова ого болужып ийер деп, билер болгон. Иегова Ильяга Бойыныҥ кӱчин јаҥыс катап кӧргӱспеген. Бир катап Иегова оныҥ мӱргӱӱлине каруу берип, теҥеринеҥ от тӱжӱрген. Иегова эмди де ого болужар эди!

Илья куй ташта болордо, Иегова ого баштанып, сураган: «Сен мында нени эдип тургаҥ?» Илья каруу берди: «Сениҥ ишчилериҥнеҥ јаҥыс мен арттым. Мен чек јаҥыскан, мени ӧлтӱрер деп, коркып турум». Илья, Иегованыҥ ишчилери ончозы ӧлтӱртип салгандар деп, бодогон. Иегова Ильяга: «Коркыба! Андый эмес. Меге бажырып турган база 7000 кижи бар. Менеҥ сеге јаан учурлу јакылта бар!» — деп айтты. Бу сӧстӧрди угала Илья сӱӱнген бе, сен канайып сананып туруҥ?~

Ильяла болгон учуралдаҥ бис неге ӱренип јадыс?~ Коркыба, бойыҥды јаҥыскан деп сананба. Иегованы ла сени сӱӱп турган најыларыҥ бар деп, сананып јӱр. Иегова сӱрекей кӱчтӱ, сеге јаантайын болужар деп, ундыбай јӱр. Сен јаҥыскан эмезиҥ деп билгени, јакшы дезеҥ?~