IRUẸMWI 7
Ohan Kevbe Ohioro He Mu Ruẹ Ẹdẹ Ra?
Ghe ọvbokhan okpia nọ rre efoto na. Ọ yevbe ne ohioro kevbe ohan muẹ, ra ẹre erriọ? Ọ he ka sunnu da ruẹ vberriọ ẹdẹ ra?
Ẹlaija ghaa rre otọe Izrẹl vbe ẹghẹ nọ kpẹre, a te miẹn wẹẹ, a bie Jesu. Ehab ne Ọba ọghe Izrẹl ma gha ga e Jehova ne Osanobua ọghe ẹmwata. Ehab kevbe ọvbokhan rẹn ghe Jezibẹl kegha ga osa ọghe ohoghe na tiẹre Bel. Rhunmwuda ọni, emwa nibun vbe otọe Izrẹl na suẹn gha ga Bel. Ekhọe ọghe Oloi e Jezibẹl keghi wegbe, ọ na gha hoo nọ gbele emwa hia fẹrẹ ni ga e Jehova rua, ya sẹ egbe Ẹlaija. Wẹ rẹn emwi ne Ẹlaija ghi ru ra?
Ẹlaija na lẹfua! Ọ na wa gha rrie uwe ato fẹfẹfẹ, ya lẹre ye uwe uvun okuta. Vbe uwẹ a roro ghẹ ọ ye irẹn ru vberriọ?
Vbe ẹghẹ ne Ẹlaija ya gha rre uwe uvun okuta, e Jehova keghi guẹ guan kevbe ọ na nọ rẹn ọta wẹẹ: ‘Vbua ru vbe mwa?’ Ẹlaija na wanniẹ wẹẹ: ‘Mẹ ọkpa ẹre ọ ghi kẹ nọ ga ruẹ. Mẹ ọkpa ẹre ọ ghi rrọọ, kevbe ohan mu mwẹ wẹẹ, a gha gbe mwẹ ruan.’ Ẹlaija kegha roro wẹẹ, a gbele emwa nikẹre ni ga e Jehova rua nẹ. Sokpan e Jehova keghi tama Ẹlaija wẹẹ: ‘Ẹn o, ẹi re erriọ. Emwa 7,000 ọvbehe ye rrọọ nọ ga mwẹ. Gha mwẹ udinmwẹ. Iwinna ye rrọ nu khian ye ru mẹ!’ Wẹ roro ẹre wẹẹ, Ẹlaija ghaa ghọghọ vbọ họn ẹmwẹ na ra?
De emwi ne ima khian miẹ ruẹ vbe emwi nọ sunnu da Ẹlaija?
TIẸRE VBE BAIBOL RUẸ
-
1 Ọba 19:3-18
-
Psalm 145:18
-
1 Pita 5:9