Cuba perdiatekenndu gambar anak si kitik enda. Mbiar ia janah sisada ngenca iakapna bana. Pernah nge kam bage?​— Kerina kalak pasti pernah bage. Pustaka si Badia nuriken kerna teman-teman Jahwe si mbiar janah sisada ngenca iakapna bana. Salah sadana eme Elia. Mari sipelajari kerna ia.

Elia nggeluh ndekah ope denga Jesus tubuh. Ia tading i Israel. Paksa si e, si jadi raja eme Ahap. La isembahna Jahwe. Ahap ras ndeharana, Isebel, nembah dibata palsu Baal. Erkiteken si e, melala kalak Israel ikut-ikuten nembah Baal. Ratu Isebel seh kal jahatna. Ibunuhna atena kerina si nembah Jahwe. Ibunuhna ka atena Elia! Kenca si e, kai si ilakoken Elia?​—

Elia kiam! Lawes ia ku taneh si mesawang janah cebuni i bas sada gua.  Menurutndu, engkai ia cebuni?​— Ue, erkiteken ia mbiar. Situhuna, Elia la perlu mbiar, erkiteken ietehna maka Jahwe banci nampati ia. Jahwe pe pernah ncidahken kehebatenNa man Elia. Contohna, pernah ijabap Jahwe toto Elia alu mpesusur api i bas langit nari. Gundari pe Jahwe pasti banci nampati Elia!

Sanga Elia tading i bas sada gua, Jahwe nungkun man bana, ’Erkai kam i jenda?’ Jabap Elia, ’Aku nari ngenca si nembah Kam. Gundari aku nari ngenca tading sisada, janah aku mbiar ibunuh.’ Iakap Elia si nembah Jahwe si debanna enggo ibunuh. Tapi ipetetap Jahwe ukur Elia, ’Lang, lit 7.000 kalak si debanna si nembah Aku. Ula kam mbiar. Lit melala tugas si deban si arus ilakokenndu!’ Menurutndu, meriah nge ukur Elia megi kerna si e?​—

Kai si banci ipelajarindu i bas cerita Elia nari?​— Kam la perlu mbiar janah labo kam sisada. Lit melala teman-temanndu si ngkelengi Jahwe ras si ngkelengi kam. Selain si e, Jahwe pe seh kal gegehna janah lalap nggit nampati kam! Emaka kam situhuna labo sisada. Meriah nge ukurndu meteh kerna si e?​—