တၢ်နီၤဖး ၇
နအိၣ်သယုၢ်ဒီး ပျံၤတၢ် တဘျီဘျီဧါ
ကွၢ်ဖိသၣ်ပိာ်ခွါဖိလၢ တၢ်ဂီၤအံၤအပူၤတဘီ. ဖျါလၢအဝဲအိၣ်သယုၢ်ဒီးပျံၤတၢ် တမ့ၢ်ဘၣ်ဧါ. နၤစ့ၢ်ကီးနကဲထီၣ်ဒ်န့ၣ် တဘျီဘျီဧါ.— တဘျီတခီၣ်န့ၣ် ပှၤခဲလၢာ်တူၢ်ဘၣ်ဝဲဒ်န့ၣ်လီၤ. လံာ်စီဆှံတဲဝဲယဟိဝၤယွၤ အတံၤသကိးလၢအအိၣ်သယုၢ်ဒီး ပျံၤတၢ်တဖၣ်အဂ့ၢ်န့ၣ်လီၤ. အဝဲသ့ၣ်အကျါတဂၤန့ၣ်မ့ၢ် စီၤအ့ၤလံယၤလီၤ. ပကမၤလိသကိး အဝဲအဂ့ၢ်မီၣ်.
နီၢ်အံၤစ့ဘ့ၤလးအဲၣ်ဒိးမၤသံ စီၤအ့ၤလံယၤ
လၢပျၢၤဖဲတချုး ယ့ၣ်ၡူးအိၣ်ဖျဲၣ်ထီၣ်ဒံးဘၣ်န့ၣ် စီၤအ့ၤလံယၤအိၣ်မူဝဲလၢ ကီၢ်အံၣ်စရ့လးအပူၤလီၤ. ပှၤအံၣ်စရ့လးဖိအစီၤပၤ စီၤအၤဃာ်န့ၣ် တဘူၣ်ထီၣ်ဘါထီၣ်ယွၤအမ့ၢ်အတီ, ယဟိဝၤယွၤန့ၣ်ဘၣ်. စီၤအၤဃာ်ဒီးအမါ နီၢ်အံၤစ့ဘ့ၤလးန့ၣ်ဘူၣ်ထီၣ်ဘါထီၣ် ယွၤအကမၣ်ဘဧၤလးလီၤ. လၢတၢ်န့ၣ်အဃိအါတက့ၢ် ပှၤအိၣ်လၢ ကီၢ်အံၣ်စရ့လးအပူၤတဖၣ်န့ၣ် ဘူၣ်ထီၣ်ဘါထီၣ်ဘဧၤလးစ့ၢ်ကီးလီၤ. နီၢ်ပၤမုၣ်နီၢ်အံၤစ့ဘ့ၤလးန့ၣ် အသးအၢဒိၣ်မးဒီးအဲၣ်ဒိးမၤသံ ပှၤလၢအဘူၣ်ထီၣ်ဘါထီၣ် ယဟိဝၤယွၤခဲလၢာ် လၢအပၣ်ဃုာ်ဒီး စီၤအ့ၤလံယၤလီၤ. နဆိကမိၣ်လၢစီၤအ့ၤလံယၤ မၤမနုၤလဲၣ်.—
စီၤအ့ၤလံယၤ ဃ့ၢ်ကွံာ်ဝဲဖးယံၤလီၤ. အဝဲလဲၤတုၤလၢမဲးမုၢ်ခိၣ် ဒီးအိၣ်ခူသူၣ်ဖဲလ့ကအိပူၤလီၤ. ဘၣ်မနုၤအဃိ အဝဲလဲၤအိၣ်ဝဲဖဲန့ၣ်လဲၣ်, နဆိကမိၣ်ဒ်လဲၣ်.— မ့ၢ်လီၤ. မ့ၢ်လၢအဝဲပျံၤတၢ်အဃိလီၤ. ဘၣ်ဆၣ်ဒီးတလိၣ်လၢ စီၤအ့ၤလံယၤကဘၣ်ပျံၤတၢ်ဘၣ်. ဘၣ်မနုၤအဃိလဲၣ်. အဝဲသ့ၣ်ညါပာ်ဝဲလၢယဟိဝၤယွၤ မၤစၢၤအီၤသ့အဃိလီၤ. လၢညါန့ၣ်ယဟိဝၤယွၤပာ်ဖျါတ့ၢ်လံ အစိအကမီၤလၢစီၤအ့ၤလံယၤလီၤ. ဘၣ်တဘျီယဟိဝၤယွၤ စံးဆၢစီၤအ့ၤလံယၤ အတၢ်ဃ့ဘါထုကဖၣ် ဒီးပျၢ်လီၤမ့ၣ်အူလၢမူခိၣ်လီၤ. လၢတၢ်န့ၣ်အဃိ ခဲအံၤစ့ၢ်ကီးယဟိဝၤယွၤ မၤစၢၤစီၤအ့ၤလံယၤကသ့သပှၢ်တၢၢ်လီၤ.
ယဟိဝၤယွၤမၤစၢၤ စီၤအ့ၤလံယၤဒ်လဲၣ်
ဖဲစီၤအ့ၤလံယၤအိၣ်ဖဲလ့ကအိပူၤအခါ ယဟိဝၤယွၤသံကွၢ်အီၤလၢ ‘ဘၣ်မနုၤအဃိ နဟဲဖဲအံၤလဲၣ်.’ စီၤအ့ၤလံယၤစံးဆၢဝဲလၢ ‘ယမ့ၢ်ပှၤအိၣ်တ့ၢ်ထဲတဂၤဧိၤလၢ အဘူၣ်ထီၣ်ဘါထီၣ်နၤ ဒီးယပျံၤလၢပှၤကမၤသံယၤလီၤ.’ စီၤအ့ၤလံယၤဆိကမိၣ်ဝဲလၢ ပှၤအဂၤတဖၣ်လၢအဘူၣ်ထီၣ်ဘါထီၣ် ယဟိဝၤယွၤန့ၣ် ပှၤမၤသံအီၤလၢာ်လံ. ဘၣ်ဆၣ်ယဟိဝၤယွၤ စံးဘၣ်စီၤအ့ၤလံယၤလၢ ‘တမ့ၢ်ဘၣ်. ပှၤလၢအဘူၣ်ထီၣ်ဘါထီၣ်ယၤ အိၣ်ဒံး အဂၤ ၇,၀၀ဝ လီၤ. ပာ်ဆူၣ်နသးတက့ၢ်. နကဘၣ်မၤယတၢ်မၤ အိၣ်ဒံးအါမးလီၤ.’ နဆိကမိၣ်လၢ စီၤအ့ၤလံယၤ ကသးခုလၢ အနၢ်ဟူဘၣ်တၢ်ကတိၤအံၤအဃိဧါ.—
တၢ်မၤအသးဒီးစီၤအ့ၤလံယၤန့ၣ် နမၤလိန့ၢ်တၢ်မနုၤလဲၣ်.— တလိၣ်လၢနကဘၣ်အိၣ်သယုၢ်ဒီး ပျံၤတၢ်ဘၣ်. နအိၣ်ဒီးတံၤသကိးတဖၣ်လၢ အအဲၣ်ယဟိဝၤယွၤ ဒီးအဲၣ်နၤစ့ၢ်ကီးလီၤ. ယဟိဝၤယွၤအိၣ်ဒီး အစိအကမီၤအါမးဒီး အဝဲကမၤစၢၤနၤထီဘိလီၤ. ယဟိဝၤယွၤ ကအိၣ်ဒီးနၤထီဘိအဃိနသးခုဧါ.—
