Shinshikaku kansi weyala wudi hamwevulu. Natiyi wuudi niwoma, netu? Watiyahu dehi wuudi niwoma?— Antu ejima atiyaña wuudi niwoma mpinji yikwawu. Bayibolu yashimuna hadi amabwambu jaYehova atiyili wudi niwoma. Wumu hakachi kawu diyi Elija. Tudizenu kulonda tumwiluki.

Elija washakamineña muIsarela kushankulu henohu Yesu kanda yavwaliki. Ahabi mwanta wawaIsarela hadifukwileña kudi Nzambi, Yehovaku. Ahabi niñodindi Yezebeli adifukwileña kudi nzambi wakutwamba Bayali. Dichi antu amavulu muIsarela atachikili kudifukula kudi Bayali. Mwadi Yezebeli wadiña watama nawa wakeñeleña kujaha antu ejima adifukwileña kudi Yehova, kushilahu niElija. Wuneluki chuma cheliliyi Elija?—

Elija watemukili. Wayili kwakulehi muchinkalampata nawa waswamini mwiyeñu.  Muloñadi chatemukililiyi?— Watiyili woma. Ilaña Elija hateleleli kutiya womaku. Muloñadi? Welukili nindi Yehova nateli kumukwasha. Yehova wamumwekesheleli Elija ñovu jindi kunyima. Mpinji yimu, Yehova wakwili kulomba kwaElija kuhitila mukutemesha kesi kufuma mwiwulu. Nihaniyi mpinji Yehova kachi wamukwashili Elija.

Hampinji yadiñiyi Elija mwiyeñu, Yehova wamwihwili nindi: ‘Wudi nakwiladi kunu?’ Elija wakwili nindi: ‘Yami hohu inashaluhu nakudifukula kudi eyi. Nidi nkawami nawa natiyi woma nami akunjaha.’ Elija watoñojokeli nindi antu ejima adifukwileña kudi Yehova anayijahi. Ilaña Yehova wamulejeli Elija nindi: ‘Hiyanayijahuku. Antu amakwawu 7,000 anakudifukula kudi ami. Bayi wutiya womaku. Nidi namudimu weneni iwatela kunzatila.’ Wunatoñojoki neyi Elija wazañaleli chatiyiliyi iyi nsañu?—

Chumanyi chiwatela kudizila kuchuma chamumwekeneni Elija?— Bayi wutiya wuudi hela womaku. Wukweti amabwambu akukeña nawa amukeña Yehova. Cheñi, Yehova wukweti ñovu yabadika nawa wukunkwashaña mpinji yejima. Wunatiyi kuwaha hakwiluka neyi wudi nkaweyi wanyi?—