သင်ခန်းစာ ၇
တစ်ယောက်တည်းဖြစ်ပြီး ကြောက်စိတ်ဝင်ဖူးသလား
ပုံထဲက ကောင်လေးကို ကြည့်ပါဦး။ သူ့ကိုကြည့်ရတာ တစ်ယောက်တည်းဖြစ်ပြီး ကြောက်နေသလိုပဲနော်။ အဲဒီလိုဖြစ်ဖူးလား။— လူတိုင်း အဲဒီလို ဖြစ်ဖူးတယ်။ ယေဟောဝါဘုရားရဲ့ သူငယ်ချင်းတချို့တောင် တစ်ယောက်တည်းဖြစ်ပြီး ကြောက်စိတ်ဝင်ဖူးတဲ့အကြောင်း ကျမ်းစာထဲမှာ ဖော်ပြထားတယ်။ အဲဒီထဲက တစ်ယောက်ကတော့ ဧလိယပဲ။ သူ့အကြောင်း တို့တွေ ဖတ်ကြည့်ရအောင်။
ဧလိယဟာ ယေရှု မမွေးခင် နှစ်အတော်ကြာက အစ္စရေးပြည်မှာ နေခဲ့တယ်။ အဲဒီတုန်းက အစ္စရေးဘုရင် အာဟပ်ဟာ ယေဟောဝါဘုရားကို မကိုးကွယ်ဘူး။ အာဟပ်နဲ့ သူ့မိန်းမ ယေဇဗေလဟာ ဘုရားအစစ်အမှန်မဟုတ်တဲ့ ဗာလဘုရားကို ကိုးကွယ်တယ်။ ဒါနဲ့ အစ္စရေးလူ အများစုကလည်း ဗာလကို စပြီးကိုးကွယ်ကြတော့တယ့်။ မိဖုရားယေဇဗေလက ယေဟောဝါဘုရားကို ကိုးကွယ်တဲ့သူအားလုံးကို သတ်ပစ်ဖို့ ကြံစည်နေတယ်။ အဲဒီထဲမှာ ဧလိယလည်း ပါတယ်။ ဒီတော့ ဧလိယ ဘာလုပ်သလဲ သိလား။ ပြောကြည့်ပါဦး။—
ဧလိယ ထွက်ပြေးသွားတယ်။ တောထဲကို ထွက်ပြေးပြီး ဂူထဲမှာ သွားပုန်းနေလိုက်တယ်။ သူ ဘာဖြစ်လို့ အဲဒီလိုလုပ်တာလဲ။—
ကြောက်လို့ပေါ့။ တကယ်တော့ ဧလိယ ကြောက်စရာမလိုပါဘူး။ ဘာဖြစ်လို့လဲ သိလား။ ယေဟောဝါဘုရား ကူညီပေးနိုင်တယ်ဆိုတာ ဧလိယ သိပါတယ်။ သူ့ကို ယေဟောဝါဘုရား တန်ခိုးပြခဲ့ဖူးတယ်လေ။ တစ်ခါကဆိုရင် ဧလိယ ဆုတောင်းလိုက်တော့ ကောင်းကင်ကနေ မီးကျလာအောင် ယေဟောဝါဘုရား လုပ်ပေးခဲ့တယ်။ အခုလည်း ယေဟောဝါဘုရားက ဧလိယကို ကူညီပေးနိုင်ပါတယ်။ဧလိယ ဂူထဲမှာ ပုန်းနေတုန်း ယေဟောဝါဘုရားက ‘ဒီမှာ ဘာလုပ် နေတာလဲ’ လို့မေးတယ်။ အဲဒီအခါ ဧလိယက ‘ကိုယ်တော့်ကို ကိုးကွယ်တဲ့ သူတွေထဲမှာ ကျွန်တော် တစ်ယောက်တည်းပဲ ကျန်တော့တယ်။ ကျွန်တော် အသတ်ခံရမှာ ကြောက်လို့ ထွက်ပြေး လာတာ’ ဆိုပြီးပြန်ဖြေတယ်။ ယေဟောဝါဘုရားကို ကိုးကွယ်တဲ့သူအားလုံး အသတ်ခံလိုက်ရပြီလို့ ဧလိယ ထင်နေတာ။ ဒါပေမဲ့ ယေဟောဝါဘုရားက ‘မင်းထင်တာ မှားနေတယ်။ ငါ့ကို ကိုးကွယ်တဲ့သူ ၇,၀၀၀ ကျန်နေသေးတယ်။ မကြောက်နဲ့။ မင်း လုပ်စရာတွေ အများကြီး ရှိနေသေးတယ်’ လို့ ဧလိယကို ပြောတယ်။ ဒီသတင်းကို ကြားတော့ ဧလိယ ဝမ်းသာသွားမယ် မဟုတ်လား။—
ဧလိယဆီကနေ တို့တွေ ဘာ သင်ယူနိုင်သလဲ။— သားတို့သမီးတို့လည်း တစ်ယောက်တည်းလို့ မခံစားသင့်ဘူး။ ကြောက်လည်း မကြောက်သင့်ဘူး။ ကလေးတို့ဆီမှာ ယေဟောဝါဘုရားကိုရော ကလေးတို့ကိုပါ ချစ်တဲ့ သူငယ်ချင်းတွေ အများကြီးရှိတယ်။ ပြီးတော့၊ တန်ခိုးအများကြီးရှိတဲ့ ယေဟောဝါဘုရားက မင်းတို့ကို အမြဲတမ်း ကူညီပေးမှာ။ ယေဟောဝါဘုရားက ကလေးတို့ကို အမြဲတမ်း ကူညီပေးမယ်ဆိုတာ သိရလို့ ဝမ်းမသာကြဘူးလား။—