Tala ou kanike ua yala ali ha fikula. A moneka ngue ali na vuoma muomu ali lika lieni, ni vati? Nove uevuaho laza ngoco ni?— Vantu vose ve ku ivuamo vintsimbu vimo. Mbimbiliya ya handeka via vamo vavusamba va Yehova va vuile vulika na vuoma. Umo uavo lizina lieni Eliya. Tu ci tantekeye vieni.

Eliya ua yoyele mu Isaleli miaka ya ingi ku nima, tele Yesu kanda a semuke. Ahave, muangana ua Isaleli, ka kele na ku lemesa Njambi ua vusunga, Yehova. Ahave na mpueyeni, Yezevele, va puile vakua ku lemesa njambi ua makuli Mbale. Ngeci cingi ca vantu mu Isaleli va putukile ku lemesa Mbale. Lisano Yezevele ua puile ua mupi cikuma kaha ua tondele ku tsiha vose va lemesele Yehova, hamo lika na Eliya! Ua tantekeya via lingile Eliya ni?—

Eliya ua tinine! Ua ile mu zindinda kaha ua ka vanda mu mpako ya livue. Mu ku mona cove vika ua lingilile ngoco?— Eyo, ua vuile vuoma. Vunoni Eliya ka pandele ku ivua vuoma. Omo lia vika? Muomu ua tantekeyele ngecize Yehova a ka mu kuasa. Ntsimbu imo, Yehova ua kumbuluile civundilo ca Eliya mu ku suluisa tuhia muilu. Ngeci mukemuo, Yehova kasi nga ua mu kuasele na ha ntsimbu ize!

Omo Eliya tele a ci li mu mpako ya livue, Yehova ua mu hulile ngueni: ‘Vika u linga kuno?’ kaha Eliya ngueni: ‘Yange lika nja lisupu kuli vaze vakua ku ku lemesa. Lika liange lika, kaha nji li na vuoma vua ku nji tsiha.’ Eliya ua singaniekele ngecize vose vakua ku lemesa Yehova va va tsihile. Vunoni Yehova ua lekele Eliya ngueni: ‘Houe kati mukemuo. Kasi kuli vantu 7.000 vali na ku nji lemesa. Simpa. Nji li na vipanga via vingi vi ua pande ku linga!’ Ua singanieka nguove Eliya ua viukilile mu ku-ivua ngoco ni?—

Vika u hasa ku lilongesa ku viuma via hitile Eliya?— Ka ua pandele ku ivua vulika ni vuoma. U li na vavusamba vaze va lema Yehova kaha va ku lema. Kaha naua Yehova ua kala na ngolo ya kama, kaha a ka ku kuasa ntsimbu yose! U na viukilila mu ku tantekeya ngecize ka uesi lika liove ni?—